თავდაცვის ყოფილი მინისტრის დავით კეზერაშვილის ადვიკატის განცხადებით, მისი დაცვის ქვეშ მყოფს, ლეგიტიმური უფლება აქვს არ წარდგეს სასამართლოს წინაშე.
შოთა მინდელის ინფორმაციით, ბრალდების მხარემ დღეს შუამდგომლობის საფუძვლად გამოიყენა ის გარემოებები, რომ კეზერაშვილი არ ცხადდება ქართული მართლმსაჯულების წინაშე, რომ მან შესაძლოა ზეწოლა მოახდინოს მოწმეებზე და გაანადგუროს მტკიცებულებები.
,,ბრალდების მხარის შუამდგომლობის საფუძველს ჩვენ დავუპირისპირეთ 80 გვერდიანი დოკუმენტი, სადაც წარმოდგენილია საერთაშორისო ორგანიზაციების დასკვნები, რომ საქართველოში მიმდინარეობს პოლიტიკურად მოტივირებული დავები, ასევე, საფრანგეთის სასამართლოს გადაწყვეტილება ექსტრადირებაზე უარის თქმასთან დაკაშირებით და ასევე ჩვენ დღეს დავუპირისპირეთ ბრალდების მხარის შუამდგომლობას პირველი საქმის გამამართლებელი განაჩენი, რაც ადასტურებს, რომ პოლიტიკურ დევნას აქვს ადგილი კეზერაშვილის მიმართ“, - განაცხადა ადვოკატმა და დასძინა, რომ სასამართლომ არ გაუსწორა თვალი დაცვის არგუმენტებს იმ პირობებში, როცა კეზერაშვილს აღკვეთის ოთხი აქვს შეფარდებული და ეს მეხუთეა.
თავდაცვის ყოფილ მინისტრს ქონების უკანონოდ მითვისების ფაქტზე 9 თვიანი პატიმრობა შეეფარდა. კეზერაშვილისთვის აღკვეთის ღონისძიების შეფარდებაზე სასამართლომ დღეს იმსჯელა. საუბარია ფოთის პორტში გადაზიდვების ბიზნესზე, რომელიც მამა-შვილ ნიჟარაძეებს ეკუთვნოდათ.
აღნიშნულ საქმეზე წინასასამართლო სხდომა 24 აგვისტოს ჩაინიშნა. გამოძიების და თავად ბიზნესმენ თამაზ ნიჟარაძის ინფორმაციით, თავდაცვის ყოფილმა მინისტრმა დავით კეზერაშვილმა ნიჟარაძეებს წილები იძულებით ჩამოართვა.
