ზოგიერთ ექსპერტს შესაძლოა, სურს, რომ პენსიები არ გავცეთ და სოციალური პროგრამები შევაჩეროთ, მაგრამ ამას არ დავუშვებთ, - ამის შესახებ ფინანსთა მინისტრის მოადგილემ გიორგი კაკაურიძემ მთავრობის სხდომის დაწყებამდე ჟურნალისტებთან განაცხადა. იგი არ ეთანხმება ექსპერტთა იმ ნაწილის მოსაზრებას, რომლებიც მიიჩნევენ, რომ ბიუჯეტის კორექტირება არაჯეროვნად მოხდა.
"ეკონომიკური ზრდის მაჩვენებლების შემცირება იწვევს საგადასახადო შემოავლების შემცირებას და შესაბამისად, ჩვენ მოვიძიეთ ალტერნატიული წყაროები, რათა დანაკლისი, რაც საგადასახადო შემოსავლების შემცირებით მივიღეთ, დავაბალანსოთ. ეს არის მეოთხე თაობის ლიცენზიები, დამატებითი გრანტები და შემოსავლების სხვა წყაროები. რაც შეეხება ექსპერტების მოსაზრებას, შესაძლოა, ზოგიერთ ექსპერტს სურს, რომ პენსია არ გავცეთ ან სოციალური პროგრამები შევამციროთ, თუმცა ამას, რა თქმა უნდა, არ დავუშვებთ. ხარჯვითი ნაწილის დაახლოებით 160 მილიონიანი შემცირება, რაც ჩვენ მოვახდინეთ, სრულიად საკმარისია და ადეკვატურია იმის, რა საჭიროებებიც უდგას ბიუჯეტს იმისთვის, რომ მოემსახუროს საგარეო ვალდებულებებს, ასევე სტიქიის შედეგების სალიკვიდაციოდ მიმართოს თანხები", - განაცხადა კაკაურიძემ.
