"ბურჯალიანს ურჩევნია, ჰააგის დავას მიხედოს, რომელიც სამარცხვინოდ წააგო," - ასე გამოეხმაურა იუსტიციის მინისტრი თეა წულუკიანი იუსტიციის მინისტრის ყოფილი მოადგილის თეა ბურჯალიანის განცახდებას.
წულუკიანის განმარტებით, ბურჯალიანის რჩევა მისთვის საინტერესო არაა.
"ბურჯალიანს ურჩევნია, მიხედოს ჰააგის იმ დავას, რომელიც სამარცხვინოდ წააგო საერთაშორისო სასამართლოში და საქართველოს დაუკარგა შანსი. ცხინვალის რეგიონში ამ დავის წაგებამ ეთნიკური წმენდა დაგვადასტურებინა. უბრალოდ დასაშვებობის კრიტერიუმი ვერ დაიცვა. ეს ის თინა ბურჯალიანია, რომელიც სტრასბურგში გირგვლიანის საქმეზე ურცხვად გვიმტკიცებდა, რომ არაფერი არ მომხდარა ისეთი, რაც სიცოცხლის უფლების დარღვევას ნიშნავსო. მათი რჩევა ჩემთვის საინტერესო არ არის," - განაცხადა თეა წულუკიანმა.
"წინა ხელისუფლებამ საქმე მოიგო, სამწუხაროდ, ეს ხელისუფლება აღსრულებას ვერ ახერხებს," - ასე გამოეხმაურა რუსეთის იუსიტიციის სამინისტროში გაკეთებულ განცხადებას საქართველოს იუსტიციის მინისტრის ყოფილი მოადგილე თეა ბურჯალიანი.
მოსკოვს 2006 წელს ქართველების მასობრივი დეპორტაციის საქმეზე კომპენსაციის შესახებ ქართული მხარისგან არანაირი მოთხოვნა არ მიუღია. ინფორმაციას ამის შესახებ ,,რია ნოვოსტი” რუსეთის იუსტიციის სამინისტროზე დაყრდნობით ავრცელებს. თუმცა, წულუკიანის მტკიცებით, თბილისი მოსკოვისგან 70 მილიონ 300 ათას ევროს, სტრასბურგის შუამავლობით ამ კვირაში მოითხოვს.
