სახელმწიფო უსაფრთხოებისთვის მაღალი რისკის მქონე სუბიექტებს საქართველოს მთავრობა, საკუთარი დადგენილებით განსაზღვრავს. აღნიშნულს ითვალისწინებს "სახელმწიფო უსაფრთხოების სამსახურის შესახებ" კანონპროექტი, სადაც იწერება ახალი თავი – "სახელმწიფო საიდუმლოებისა და სახელმწიფო უსაფრთხოების რეჟიმის დაცვა".
ამ სუბიეტებისთვის სახელმწიფო უსაფრთხოების სამსახური, სახელმწიფო უსაფრთხოების დაცვის რეჟიმს დაადგენს, გაუწევს მათ სათანადო კონსულტაციას და გაუწევს კონტროლს უსაფრთხოების რეჟიმის დაცვას.
აღნიშნულ საკითხზე განმარტებები პარლამენტის იურიდიულ საკითხთა კომიტეტის დღევანდელ სხდომაზე გაკეთდა, სადაც საკანონმდებლო პაკეტის მეორე მოსმენით განხილვა მიმდინარეობს.
"სახელმწიფო უსაფრთხოების სამსახურის უფროსი ვერანაირ სახელმწიფო უსაფრთხოების ოფიცერს ვერ დანიშნავს. პროექტით განისაზღვრა, რომ ზოგადად, უსაფრთხოების რეჟიმები შეეხება მხოლოდ იმ სახელმწიფო, თუ არასახელმწიფო სუბიექტებს, რომელთა თაობაზეც მთავრობა მიიღებს დადგენილებას, რომ ეს სუბიექტები სახელმწიფო უსაფთხოებისათვის მაღალი რისკის საფრთხის მქონე სუბიექტებს წარმოადგენენ. უნდა გაკეთდეს სუბიექტების ზუსტი ჩამონათვალი და მხოლოდ იქ შეიძლება დაადგინოს უსაფრთხოების სამსახურმა უსაფრთხოების რეჟიმი. თავად რეჟიმის განხორციელება და რეჟიმის უზრუნველყოფა იმ სუბიექტის პასუხისმდებლობა იქნება. კონტროლს სახელმწლიფო უსაფრთხოების სამსახური განახორციელებს", – აღნიშნა საკომიტეტო განხილვისას ვახტანგ ხმალაძემ.
შსს მინისტრის ლევან იზორიას განცხადებით, გამოყენებული იქნება განვითარებული ქვეყნების პრაქტიკა.
"პროექტით შემოთავაზებულია ახალი თავი, რომელიც ითვალისწინებს რეგულაციებს, რაც სხვადასხვა სამსახურებში უსაფრთხოების დაცვის ინტერესს ემსახურება. ეს ინსტიტუციონალური თანამშრომლობა სახელშეკრულებო დონეზე იქნება, ანუ ის პრაქტიკა, როცა სამსახურის ხელმძღვანელი ნიშნავდა ე.წ. უსაფრთხოების თუ უშიშროების ოფიცერს, ამ ინიციატივით უკვე გათვალისწინებული არ არის", - აღნიშნა იზორიამ.
