პარლამენტის ადამიანის უფლებათა დაცვის კომიტეტში მარიხუანის დეკრიმინალიზაციასთან დაკავშირებით მსჯელობენ.
კომიტეტის წევრებს, ცვლილებების ინიციატორმა გოგა ხაჩიძემ „სისხლის სამართლის კოდექსსა“ და „ადმინისტრაციულ სამართალდარღვევათა კოდექსში“ შესატანი ცვლილებები დღეს, პირველი მოსმენით გააცნო.
მისი თქმით, კანონპროექტი მოწყვეტილია ყოველგარ პარტიულობას და ის მზადაა, პროექტში კორექტირება შეიტანოს.
,,ეს ცვლილება ერთადერთ რამეს ითხოვს - არ დავიჭიროთ. არც ჯანდაცვის კუთხით და არც საგანმანათლებლო თვალსაზრისით, არ ვიცი, რომელი ასპექტი შეიძლება ჩავთვალოთ, რომ დაჭერა სწორი ფორმაა. თუკი ვამბობთ, რომ ისედაც არ ვიჭერთ, მაშინ მანიპულაციებისთვის ჩანაწერებს ნუ დავტოვებთ. ბევრ ადამიანს სისხლის სამართლის დამნაშავის სტატუსის მატარებლად იმის გამო ნუ გადავაქცევთ, რომ მან ორჯერ მარიხუანა მოიხმარა“, - მიმართა უმრავლესობის წევრებს ხაჩიძემ.
კანონპროექტის თანახმად, კანაფის (ზეთი, ფისი, ნაყენი, მცენარე), მარიხუანის (გამომშრალინედლი) მცირე ოდენობით უკანონოდ შეძენა ან შენახვა გასაღების მიზნის გარეშე, ან ნარკოტიკული საშუალების მოხმარება ექიმის დანიშნულების გარეშე, არ უნდა იწვევდეს სისხლისსამართლებრივ პასუხისმგებლობას მისი განმეორებით ჩადენის შემთხვევაშიც, რადგან აღნიშნული ქმედება სისხლისსამართლებრივად საშიში არ არის.
ამასთან, დეპუტატი კანონმდებლებს სთავაზობს, მარიხუანის მოხმარებისთვის, ადმინისტრაციული ჯარიმის შემცირებას 500 ლარიდან 100 ლარამდე, ხოლო განმეორებით შემთხვევაში - 300 ლარამდე შემცირებას. გარდა ამისა, კანონპროექტის შესწორებები ითვალისწინებს 15-დღიანი ადმინისტრაციული დაკავების გაუქმებას.
