იუსტიციის მინისტრის თეა წულუკიანის გაცხადებით, სამოქალაქო კანონმდებლობაში შავით თეთრზე წერია, რომ საქართველოში ოჯახი არის ქალისა და მამაკაცის ერთობა. თუმცა, როგორც წულუკიანმა საკითხის კომენტირებისას განაცხადა, ის წინააღმდეგი არ იქნება, თუ ეს ერთობა საკონსტიტუციო რანგში ავა.
მინისტრის თქმით, საქართველოს მოსახლეობა ოჯახს ქალისა და კაცის ერთობად მოიაზრებს, შესაბამისად ხელისუფლება ვერ გადადგამს ნაბიჯს ამის შესაცვლელად.
,,ყველა ქვეყანაში კანონები ამ საკითხზე, თუ რა იგულისხმება ოჯახში, უნდა იყოს თუ არა ერთსქესიანი ქორწინება, დგინდება იმის მიხედვით, როგორია საზოგადოებრივი კონსესუსი. აშშ-ში როგორც ჩანს, ამ თემაზე კონსესუსი არსებობდა, მიიღეს ის გადაწყვეტილება, რომელიც მიიღეს და ეს მისაღებია იმ საზოგადოებისთვის. ვიდრე საქართველოში ეს კონსესუსი არ არსებობს, ვერც ერთი ხელისუფლება, მათ შორის ჩვენი, ვერ გადადგამს რაიმე ტიპის ნაბიჯს, რომ შეცვალოს ეს კანონი. დღეს რაც არის კანონი, რომ ქალი და მამაკაცი ქმნის ოჯახს, ასეთადვე დარჩება ის საქართველოში, რადგან საქართველოს საზოგადოება სწორედ ასეთად მოიაზრებს ოჯახს ჩვენს ქვეყანაში", - განაცხადა თეა წულუკიანმა.
,,ყველაფერს გავაკეთებ, რათა კონსტიტუციაში გაკეთდეს ჩანაწერი, რომ ქორწინება და ოჯახი არის ქალისა და მამაკაცის ერთობა” - ამის შესახებ, პრემიერ-მინისტრმა ირაკლი ღარიბაშვილმა ,,ასავალ-დასაგვალთან” განაცხადა. მისი თქმით, მსოფლიოში ყველა სახელმწიფო ამ საკითხს თავისებურად წყვეტს და საქართველომაც თავისებურად უნდა მოაგვაროს.
