თბილისის მერიაში დღეს ახალი გზისა და ხეობის რეაბილიტაციის გრძელვადიან პროექტსა და ვაკე-საბურთალოს დამაკავშირებელი მაგისტრალის აღდგენის მოკლევადიან გეგმაზე მსჯელობენ. ეს არის პირველი სამუშაო შეხვედრა მას შემდეგ, რაც შესაბამისი განკარგულება პრემიერმა გასცა.
ქალაქის მერის, დავით ნარმანიას, განცხადებით, მოკლევადიანი სამუშაოები სექტემბრამდე უნდა მოგვარდეს.
„აღდგენის გეგმა სექტემბრამდე უნდა შემუშავდეს, ან თუ სექტემბრამდე აღდგენა შეუძლებელია ან აზრი არა აქვს ამ გზის აღდგენას, ასეთ შემთხვევაში უნდა განვსაზღვროთ, როგორ შეიძლება დავარეგულიროთ ალტერნატიულად ტრანსპორტის მოძრაობა. ანუ უნდა გადავწყვიტოთ, ალტერნატიული გადაადგილების სქემები მოვძებნოთ, თუ გადაუდებლად გზით დავიწყოთ გზის აღდგენა,“ - აცხადებს დავით ნარმანია.
