ირაკლი ალასანია ე.წ. კაბელების საქმესა და პოლიტიკურ ძალთა გადანაწილებას შორის კავშირზე საუბრობს. „კურიერის“ პირდაპირ ეთერში მან განაცხადა, რომ კაბელების საქმემ კოალიციაში განხეთქილება გამოიწვია.
„ამან ხომ გამოიწვია განხეთქილება კოალიციაში, ამან გამოიწვია ის პოლიტიკური კრიზისი, რომელშიც ჩვენ შევედით ოქტომბრის შემდეგ და დღესაც ამ კრიზისის გარკვეული შედეგებია, რასაც პოლიტიკაში ვიმკით. ეს იყო გარკვეული რუბიკონი, როდესაც შეიცვალა გარკვეული ძალთა ბალანსი. რის გამო?-იმიტომ, რომ ერთმა კაცმა აიხირა ის, რომ პოლიტიკური მოწინააღმდეგის ჩამოცილება უნდოდა. დღეს ისიც თქვა, რომ ალასანიამ ოქტომბერში გადაწყვიტა პარტიული მშენებლობაო. მე ივნისში მქონდა მასთან ერთადერთი შეხვედრა სადაც ამაზე გვქონდა საუბარი და მას შემდეგ დაავალა პროკურატურას, რომ მოეჩიჩქნა რამე ჩვენს წინააღმდეგ. ქრონოლოგიაც კი ეშლება და საკუთარ ვირტუალურ სამყაროშია ეს ადამიანი“,- განაცხადა ალასანიამ.
