"ისევ ბლეფშია ალასანია, ისევ ცრუობს, ისევ ყალბია”, _ამის შესახებ, ყოფილმა პრემერმა ბიძინა ივანიშვილმა განაცხადა და ე.წ. კაბების საქმეზეც ისაუბრა.
,,რამდენადაც კაბელების საქმეს შევეხეთ. მინდა, პატარა ექსკურსი გავკეთო და რომ გავიხსენოთ ეს პროცესი, როდესაც ივნისში პროკურატურა შევიდა თავდაცვის სამინისტროში, როდესაც ალასანია გახლდათ ისევ თავდაცვის მინისტრი. დაახლოებით, სექტემბერში ალასანია აკეთებს განცხადებას, იწვევს ყრილობას, რომ ის გახდება თავმჯდომარე, რაც გასაოცარი იყო ნებისმიერი პოლიტიკოსისგან და დღეს ეს უკვე აიხსნება, რატომ გააკეთა. მან უკვე დაგეგმა, რომ პოლიტიკაში გადაეტანა ის, რაც ხდებოდა თავდაცვის სამინისტროში და პოლიტიკური სპეკულაციებით გადაეფარა ის რეალობა, რაც მის სამინისტროში ხდებოდა”, - განაცხადა ბიძინა ივანიშვილმა.
შეგახსენებთ, რომ საქართველოს მთავარმა პროკურატურამ შუამდგომლობით მიმართა თბილისის საქალაქო სასამართლოს, რომლითაც მოითხოვა განსაკუთრებით დიდი ოდენობით საბიუჯეტო თანხების გაფლანგვის საქმეზე დაკავებული საქართველოს თავდაცვის სამინისტროს ყოფილი თანამდებობის პირების: ნუგზარ კაიშაურის, გიზო ღლონტის, დავით წიფურიას, გიორგი ლობჟანიძის, არჩილ ალავიძის მიმართ გამოყენებული პატიმრობის გაუქმება და აღკვეთის ღონისძიების სახით არასაპატიმრო აღკვეთის ღონისძიების გირაოს შეფარდება.
თავდაცვის ყოფილი მინისტრი ირაკლი ალასანია დარწმუნებულია, რომ ხვალ ე.წ. კაბელების საქმეზე ბრალდებულებს სასამართლო გაათავისუფლებდა. სწორედ ამით ხსნის "თავისუფალი დემოკრატების" ლიდერი პროკურატურის შუამდგომლობას დაკავებული პირებისათვის წინასწარი პატიმრობის გირაოთი შეცვლის თაობაზე.
,,გადაწყვეტილება, რომლის მიღებასაც ხვალ ველოდებით, იქნება პირველი ნაბიჯი უსამართლობის წინააღმდეგ. რასაც კიდევ უფრო დიდი გამარჯვება მოჰყვება. ბიძინა ივანიშვილის პოლიტიკური ტყვეობიდან 5 უდანაშაულო ადამიანის გამოხსნა იქნება დიდი ნაბიჯი სამომავლოდ ყველა უდანაშაულოდ დაჩაგრული ადამიანის გასათავისუფლებლად. საზოგადოების ერთსულოვნება და გვერდში დგომა რომ არ ყოფილიყო, დღეს ეს შედეგი არ გვექნებოდა. დღეს ბიძინა ივანიშვილი დამარცხდა", - განაცხადა ჟურნალისტებთან ირაკლი ალასანიამ.
