საქართველოს ყოფილი პრემიერ-მინისტრი ბიძინა ივანიშვილი მიიჩნევს, რომ ზოოპარკთან დაკავშირებული მოვლენები ახალი ზოოპარკის შექმნას მისცემს ბიძგს, რაზეც იგი წლების წინ საუბრობდა.
ზოგი ჭირი მარგებელია - განაცხადა ივანიშვილმა ჟურნალისტებთან და დასძინა, რომ არ იცის, ვის რამდენად მოეწონება მისი ეს ნათქვამი.
"ზოოპარკი იმ პირობებში, რაც იყო, მე არასდროს მომწონდა. 2006-2007 წლებში პროექტიც კი გავაკეთე და გარკვეული თანხები დავხარჯე. ვპირდებოდი მთავრობას, რომ დავეხმარებოდი დაფინანსებაში, რომ ცხოველს ჰქონდეს ცხოველური პირობები, თუ გინდათ ასე ვთქვათ, ადამიანური პირობები. თუ ვატყვევებთ ცხოველს, მოვექცეთ ღირსეულად. ვფიქრობ, ჩვენი ზოოპარკი ამ მხრივ, სანიმუშო დონეზე ვერ იყო", - აღნიშნა ივანიშვილმა და დასძინა, რომ მთავრობას ზოოპარკის გადატანაში დაეხმარება, თუმცა ეს არ ნიშნავს რომ იგი ზოოპარკს ყიდულობს.
