პროკურორ ლევან ბაჩიაშვილის განმარტებით, საქართველოს მთავარმა პროკურატურამ დღეს თბილისის საქალაქო სასამართლოს, თავდაცვის სამინისტროს ყოფილი თანამდებობის პირებთან დაკავშირებით შუამდგომლობით მიმართა.
პროკურატურის ინფორმაციით, უწყებამ მოითხოვა განსაკუთრებით დიდი ოდენობით საბიუჯეტო თანხების გაფლანგვის საქმეზე დაკავებული საქართველოს თავდაცვის სამინისტროს ყოფილი თანამდებობის პირების: ნუგზარ კაიშაურის, გიზო ღლონტის, დავით წიფურიას, გიორგი ლობჟანიძის, არჩილ ალავიძის მიმართ გამოყენებული პატიმრობის გაუქმება და აღკვეთის ღონისძიების სახით არასაპატიმრო აღკვეთის ღონისძიების გირაოს შეფარდება.
,,ბრალდების მხარის მიერ ამგვარი შუამდგომლობის დაყენება განპირობებულია ორი მოტივით. პირველ რიგში უნდა აღინიშნოს, რომ 2015 წლის 28 ივლისს საქმეზე იწურება ბრალდებულების მიმართ შეფარდებული პატიმრობის 9-თვიანი ვადა, მაშინ როდესაც საქმეზე ჯერ კიდევ დამთავრებული არ არის 1 აპრილს დაწყებული წინასასამართლო განხილვები. წინასასამართლო განხილვებმა გასტანა თითქმის 3 თვე, რაც უპრეცედენტო შემთხვევაა საერთო სასამართლოების პრაქტიკაში. ამავდროულად, პატიმრობის გაუქმების შუამდგომლობა ეფუძნება იმ გარემოებას, რომ პროკურატურის მიერ სასამართლოში წარდგენილი ყველა მტკიცებულება 15 ივნისიდან ცნობილია დასაშვებად, რაც ამცირებს ბრალდებულების მხრიდან მოწმეებზე გავლენის მოხდენის და მტკიცებულებების განადგურების რისკებს. შესაბამისად, მთავარი პროკურატურა თვლის, რომ ბრალდებულების განგრძობადი ყოფნა წინასწარ პატიმრობაში, მაშინ როცა მტკიცებულებები დასაშვებად არის ცნობილი და წინასასამართლო განხილვები სწრაფად შეიძლება ვერ დასრულდეს, აღარ არის აუცილებელი საქმეზე ჭეშმარიტების დადგენის მიზნით და სავსებით შესაძლებელია, რომ ბრალდებულები თავიანთ საქმეზე განაჩენის გამოტანას დაელოდონ შინ. ყოველივე ზემოაღნიშნულის გათვალისწინებით, ჩვენ მივიღეთ ამ ეტაპისათვის ერთადერთი სამართლებრივად მიზანშეწონილი გადაწყვეტილება, რომელიც მკაცრად შესაბამისობაშია ევროპულ სტანდარტებთან, მათ შორის ადამიანის უფლებათა ევროპული კონვენციის პრეცედენტულ სამართალთან, და მივმართეთ სასამართლოს შუამდგომლობით ხსენებული ბრალდებულების მიმართ აღკვეთის ღონისძიების პატიმრობის გირაოთი შეცვლის მოთხოვნით", - აღნიშნა პროკურორმა.
საქმეზე მორიგი წინასასამართლო სხდომა 19 ივნისს, 11:00 საათზეა დანიშნული.
