ე.წ. კაბელების საქმის ადვოკატის ლევან სამუშიას შეფასებით, მთავარმა პროკურატურამ გააცნობიერა, რომ მისთვის სასურველი გადაწყვეტილების მიღება შეუძლებელია და ცდილობს რვათვიანი უკანონობა შერბილებული სახით წარმოაჩინოს.
,,ჯი-ეიჩ-ენთან” საუბარში ადვოკატმა ასევე აღნიშნა, რომ ცოტა ხანში კაბელების საქმეზე გამამართლებელი განაჩენი დადგება.
,,პროკურატურა აცნობიერებს რასთან აქვს საქმე. ჩვენ რვა თვის განმავლობაში ვამბობდით, რომ საქმეში არანაირი მტკიცებულება არ არსებობდა და პროკურატურა ხვდება, რომ მათთვის სასურველი შედეგის მიღწევა გამორიცხული და შეუძლებელია.Aაქედან გამომდინარე, ცდილობს, რვათვიანი უკანონობა რომელიც ხორციელდებოდა, შერბილებული სახით წარმოაჩინოს. იმედი მაქვს, რომ ცოტა ხანში ე.წ. კაბელების საქმეზე სამართლიანობა იზეიმებს და გამამართლებელი განაჩენი დადგება”, -აცხადებს ლევან სამუშია.
კითხვაზე - მთავარმა პროკურატურამ აღნიშნული გადაწყვეტილებით ერთგვარად დაიხია თუ არა უკან ადვოკატი განმარტავს:
,,ამ ეტაპზე სხვა კომენტარის გაკეთება არ მინდა, იმის გარდა რაც ვთქვი. შემიძლია გითხრათ, რომ შემდეგ პროცესებზე დაკავებულების უდანაშაულობა დადასტურდება”, _განაცხადა ადვოკატმა ლევან სამუშიამ ,,ჯი-ეიჩ-ენთან” საუბარში.
მისივე თქმით, დაცვის მხარე პროცესზე ბრალდებულების ყოველგვარი აღმკვეთის ღონისძიების გარეშე გათავისუფლებას მოითხოვს.
,,დაცვის მხარე ხუთივე დაკავებულების ყოველგვარი აღმკვეთის ღონისძიების გარეშე დატოვებას მოითხოვს, რადგან არ არსებობს საფუძველი, რომ მათ პატიმრობა გირაოთი შეცვალოთ და ისინი ყოველგვარი აღმკვეთის ღონისძიების გარეშე უნდა გათავისუფლდნენ”, _განაცხადა სამუშიამ.
შეგახსენებთ, რომ საქართველოს მთავარმა პროკურატურამ შუამდგომლობით მიმართა თბილისის საქალაქო სასამართლოს, რომლითაც მოითხოვა განსაკუთრებით დიდი ოდენობით საბიუჯეტო თანხების გაფლანგვის საქმეზე დაკავებული საქართველოს თავდაცვის სამინისტროს ყოფილი თანამდებობის პირების: ნუგზარ კაიშაურის, გიზო ღლონტის, დავით წიფურიას, გიორგი ლობჟანიძის, არჩილ ალავიძის მიმართ გამოყენებული პატიმრობის გაუქმება და აღკვეთის ღონისძიების სახით არასაპატიმრო აღკვეთის ღონისძიების გირაოს შეფარდება.
საქმეზე მორიგი წინასასამართლო სხდომა თბილისის საქალაქო სასამართლოში დანიშნულია 2015 წლის 19 ივნისს 11:00 საათზე, სადაც მოხდება ბრალდების მხარის მიერ წარდგენილი პატიმრობის გაუქმების შუამდგომლობის განხილვა.
