შინაგან საქმეთა მინისტრის ლევან იზორიას განცხადებით, ე.წ. ოდეერის ინსტიტუტის არსებობა აუცილებელია და ეს პრაქტიკა მთელ რიგ განვითარებულ ქვეყნებში არსებობს.
შსს-ს გაყოფის შესახებ კანონპროექტზე პარლამენტში საუბრისას იზორიამ განაცხადა, რომ ამ უსაფრთხოების ოფიცრის ინსტიტუტის მთავარი აზრია, საიდუმლო ინფორმაცია იყოს დაცული.
,,საიდუმლო ინფორმაციის რეჟიმის დაცვაზე იყოს პასუხისმგებელი ის, ვინც არის კვალიფიციური. ამ ინსტიტუტის არსებობა გამართლებულია იმ თვალსაზრისით, რომ გარკვეულ სახელმწიფო ორგანოებში, სადაც შეიძლება მაღალი რისკი იყოს სახელმწიფო უსაფთხოების კუთხით, განხორციელდეს გარკვეული პრევენციული მოქმედებები. მათ შორის კონტრდაზვერვითი საქმიანობის განხორციელების კუთხით. განსაკუთრებით ისეთი დანაშაულების წინააღმდეგ, როგორც არის ჯაშუშობა, სამხედრო ხელმძღვანელობის უკანონოდ ხელში ჩაგდება, საბოტაჟი და სხვა. გამომდინარე აქედან, ინტერესი ამ მიზნებს ემსახურება", - აღნიშნა იზორიამ და დასძინა, რომ ოდეერის შესახებ კანონში ჩანაწერი კიდევ უფრო დაკონკრეტდება.
"სახელმწიფო უსაფრთხოების სამსახურის შესახებ" კანონპროექტის თანახმად, სამსახური უფლებამოსილი იქნება, საჭიროების შემთხვევაში, თავისი ამოცანების შესასრულებლად, სახელმწიფოს უშიშროებისათვის განსაკუთრებული მნიშვნელობის მქონე სახელმწიფო ორგანოებსა და დაწესებულებებში, აგრეთვე საზღვარგარეთ საქართველოს სახელმწიფო წარმომადგენლობებში, დანიშნოს ოფიცერი უშიშროების საკითხებში.
