კიევის ოლქში მდებარე ნავთობაზაზე ხანძრის გაჩენის ერთ-ერთ მიზეზად ბენზინის კუსტარულად დამზადების მცდელობისას გაუთავლისწინებელი ქიმიური რეაქცია სახელდება.
ამის შესახებ განცხადება უკრაინული კონსალტინგური ჯგუფის ,,ა-95”-ის დირექტორმა სერგეი კუიუნმა საკუთარ წყაროებზე დაყრდნობით გააკეთა.
,,ბოლო მონაცემების მიხედვით, ჩემთვის ცნობილი გახდა, რომ ბაზაზე ბენზინის კუსტარული წარმოებისთვის ახალ კომპონენტებს იყენებდნენ და გაუთვალისწინებელი იზოთერმული რეაქცია მიიღეს, რამაც მილის გახეთქვა, შემდეგ კი უკვე ნივთიერების ძრავში ჩაღვრა გამოიწვია.” - აღნიშნა მან სააგენტო ,,ინტერფაქს-უკრაინასთან” საუბარში.
მისი თქმით, ხანძრის გაჩენის შემდეგ აღმოჩნდა, რომ ნავთობაზის ტერიტორიაზე არც სახანძრო რეზერვუარები და არც ქაფწარმომქმნელი საშუალებები იყო.
,,ჯერ კიდევ ერთი წლის წინ, როცა პერეიასლავის ნავთობაზაზე აფეთქება მოხდა, რომლის დროსაც ოთხი ადამიანი დაიღუპა და ხუთი - დასახიჩრდა, ვამბობდი, რომ ტრაგედიის მიზეზი სადგურის მშენებლობის დროს უსაფრთხოების წესების დარღვევა იყო.
მაშინ პასუხისმგებლობა არავის დაკისრებია და არც ციხეში ჩაუსვამთ ვინმე... ერთი წლის შემდეგ კი, თავისი მასშტაბებით და შედეგებით, უფრო დიდი ტრაგედია მივიღეთ.
კიდევ რა უნდა მოხდეს, რომ ხელისუფლებამ ამ სფეროს და განსაკუთრებით, საწვავის კუსტარულად წარმოებას სერიოზული ყურადღება მიაქციოს.” - განუცხადა ჟურნალისტებს სერგეი კუიუნმა.
შეგახსენებთ, რომ კიევის ოლქში, ვასილკოვოს რაიონის სოფელ კრიაჩკში მდებარე ნავთობაზაზე ხანძარი წუხელ ღამე გაჩნდა, რამაც ძლიერი აფეთქებების სერია გამოიწვია.
უკრაინის შსს-ს მიერ გავრცელებული ინფორმაციით, ამ დროისთვის ხანძრის შედეგად სხეულზე მძიმე დაზიანებები 14 მეხანძრემ და მაშველმა მიიღო, ერთი ადამაინი კი - დაიღუპა.
ადგილზე მობილიზებულია სახანძრო და სამაშველო ტექნიკა, საჯარისო და სამაშველო ქვედანაყოფები, თუმცა ძლიერი ხანძრის ლოკალიზება ვერ ხერხდება.
საინფორმაციო საშუალებების მიერ გავრცელებული ბოლო ინფორმაციით, ნავთობაზიდან ხანძარი ტყის მასივებსა და ახლომდებარე მეორე ნავთობაზაზე გადავიდა.
არსებობს საშიშროება, რომ ცეცხლი სამხედრო დასახლებასა და აეროდრომსაც მოედოს.
ნავთობაზის მიმდებარე სოფლებში მოსახლეობის ევაკუაცია მიმდინარეობს.
