,,თავისუფალი დემოკრატების” წევრი ზესტაფონის მუნიციპალიტეტის საკრებულოს განათლების, კულტურის, სპორტის და ახალგაზრდულის კომისიის თავმჯდომარე ოლეგ ჭანკოტაძე თანამდეობიდან გაათავისუფლეს.
პარტიის წევრები პოლიტიკური ნიშნით დევნის მორიგ ფაქტზე საუბრობენ და აცხადებენ, რომ ეს არის „უსუსური“ ხელისუფლების პასუხი „თავისუფალი დემოკრატების“ პოლიტიკურ აქტივობაზე.
„ოლეგ ჭანკოტაძემ 5 ივნისს საკრებულოს სხდომა პროტესტის ნიშნად დატოვა, რადგან სოფელ კდეეთის გზის რეაბილიტაციის 2014 წლის დეკემბერში დამტკიცებული პროექტი, საკრებულომ გააუქმა. 8 ივნისს, საკრებულოს იურიდიული კომისიის თავმჯდომარემ კახა შავგულიძემ, რომელიც კოალიცია ,,ქართული ოცნების“ წევრია კონსერვატიული პარტიიდან, სხდომაზე დააყენა ოლეგ ჭანკოტაძის კულტურის, განათლების და ახალგაზრდულ საქმეთა კომისიის თავმჯდომარეობიდან გადაყენების საკითხი. კენჭისყრაში ოპოზიციური პარტიების არც ერთმა წარმომადგენელმა მონაწილეობა არ მიიღო, თუმცა 18 ხმით ჭანკოტაძე გადაყენებული იქნა თანამდებობიდან. არც იურიდიული კომისიის თავმდომარეს და მმართველი კოალიციის არც ერთ წევრს ჭანკოტაძის თანამდებობიდან გადაყენების არგუმენტი არ დაუსახელებიათ.
ჩვენ, ,,თავისუფალი დემოკრატები“ ვაცხადებთ, რომ ეს არის უსუსური ხელისუფლების პასუხი „თავისუფალი დემოკრატების“ პოლიტიკურ აქტივობაზე რეგიონებში. ეს არის არა მხოლოდ დისკრიმინაცია და პოლიტიკური ნიშნით დევნა, ამ უსამართლო გადაწყვეტილებებით ასევე მნიშვნელოვნად ზარალდება მოსახლეობა. იმ ფონზე, როდესაც თვითმართველობები უფუნქციოა და რეალურად ყველგან სუსი აკონტროლებს სიტუაციას, ,,თავისუფალი დემოკრატების“ წარმომადგენლები არიან ის კვალიფიციური ძალა, რომელიც უზრუნველფყოფს ადგილობრივი მოსახლეობის ინტერესების დაცვას საკრებულოებში“,-ნათქვამია პარტიის განცხადებაში.
,,თავისუფალი დემოკრატები“ აცხადებენ ასევე, რომ ყოველთვის გააპროტესტებენ, პოლიტიკური ნიშნით, მათი პარტიის წევრების დევნის თითოეულ ფაქტს და სამართლებრივი მეთოდებით ბოლომდე იბრძოლებენ.
