უკრაინის შინაგან საქმეთა სამინისტროს პრეს-ცენტრის ცნობით, კიევის ოლქის ვასილკოვოს რაიონში აფეთქებული ნავთობაზის ახლო-მახლო სოფლებიდან მაშველებს მოსახლეობა სამშვიდობოს გაჰყავთ.
ევაკუაცია სოფელ კრიაჩკისა და კობციში დილიდანვე გამოაცხადეს.
შეგახსენებთ, რომ კიევის ოლქში, ვასილკოვოს რაიონის სოფელ კრიაჩკში მდებარე ნავთობაზაზე ხანძარი წუხელ ღამე გაჩნდა, რამაც ძლიერი აფეთქებების სერია გამოიწვია.
უკრაინის შსს-ს მიერ გავრცელებული ინფორმაციით, ამ დროისთვის ხანძრის შედეგად სხეულზე მძიმე დაზიანებები 14 მეხანძრემ და მაშველმა მიიღო, ერთი ადამაინი კი - დაიღუპა.
ადგილზე მობილიზებულია სახანძრო და სამაშველო ტექნიკა, საჯარისო და სამაშველო ქვედანაყოფები, თუმცა ძლიერი ხანძრის ლოკალიზება ვერ ხერხდება.
საინფორმაციო საშუალებების მიერ გავრცელებული ბოლო ინფორმაციით, ნავთობაზიდან ხანძარი ტყის მასივებზე გადავიდა და ის ახლომდებარე სამხედრო დასახლებისკენ და აეროდრომისკენ მიიწევს.
