ოდესის ოლქის ადმინისტრაციის ხელმძღვანელი მიხეილ სააკაშვილი ადგილობრივ მოსახლეობას შეპირდა, რომ ძალოვან სტრუქტურებში ჩატარებული რეფორმების შედეგად, მათ პატიოსანი მილიციელები და მებაჟეები ეყოლებათ.
ამის შესახებ მან კომინტერნოვსკის რაიონის სოფელ პერშოტრავნევოის მცხოვრებლებთან შეხვედრისას ისაუბრა და ოდესის ოლქის ძალოვან სტრუქტურებში მოსალოდნელი ცვლილებები დააანონსა, თუმცა კონკრეტული პირები არ დაუსახელებია.
,,იქნება ძალიან პატიოსანი მილიციელი, რომელიც ქრთამს არ აიღებს და მას თქვენ ძალიან მალე იხილავთ.”- განუცხადა მასთან შესახვედრად შეკრებილ ხალხს და აქცენტი უკრაინის შსს-ს ოდესის ოლქის განყოფილების უფროსის თანამდებობიდან გათავისუფლების ფაქტზე გააკეთა. ასევე, პირობა დადო, რომ მსგავსი რეორგანიზაცია ოდესის საოლქო პროკურატურაშიც ჩატარდება.
ოდესის ოლქის გუბერნატორმა აღნიშნა, რომ ძალიან მალე საბაჟო დაწესებულებებში ვაკანტურ ადგილებზე კონკურსი გამოცხადდება.
,,მე დიდი იმედი მაქვს, რომ 45 მილიონიან ქვეყანაში პატიოსან მთავარ მებაჟეს ვიპოვით.” - განაცხადა მან.
შეგახსენებთ, რომ მიხეილ სააკაშვილის მიერ გაკეთებული ამ განცხადებების შემდეგ, ზოგიერთ უკრაინულ საინფორმაციო საშუალებაში დღეს უკვე გაჩნდა მოსაზრება, რომ ოდესის ოლქის მილიციის განყოფილების უფროსის პოსტს საქართველოს შინაგან საქმეთა მინისტრის ყოფილი მოადგილე გია ლორთქიფანიძე დაიკავებს.
