მოკლული ლაშა მახარაძის დედა ნინო დიდებულიძე მიიჩნევს, რომ არასამთავრობო ორგანიზაციებს, ოქროპირიძის საქმესთან დაკავშირებით, საზოგადოება შეცდომაში შეყავს.
საქალაქო სასამართლოსთან, სადაც გიორგი ოქროპირიძისთვის აღმკვეთი ღონისძიების შეფარდების საკითხზე მსჯელობენ, დიდებულიძემ მოუწოდა არასამთავრობოებს ბოდიში მოუხადონ ირაკლი ღარიბაშვილს.
"არ უნდა მოხდეს მისი ციხიდან გამოშვება. იმედია სამართლიანი მოსამართლეა, ვიცნობ მე მას. აგრეთვე მინდა მოვუწოდო არასამთავრობოებს, ნუ შეყავთ ხალხი შეცდომაში. ღარიბაშვილს მოუდახდონ ბოდიში, მას კანონი არ დაურღვევია და არც მოსამართლის გვარი დაუსახელებია. მე ვამბობ, რომ ოქროპირიძე არ უნდა გამოუშვან," - აცხადებს ნინო დიდებულიძე.
ლაშა მახარაძის მკვლელობაში ბრალდებულისთვის ახალ საქმეზე აღმკვეთი ღონისძიების შეფარდებაზე საქალაქო სასამართლო დღეს იმსჯელებს.
ბრალდება ოქროპირიძისთვის პატიმრობას ითხოვს. ცრუ დასმენის ფაქტზე გიორგი ოქროპირიძეს ბრალი გუშინ წარედგინა.
შეგახსენებთ, რომ გიორგი ოქროპირიძეს წინასწარი პატიმრობის ვადა 12 ივნისს ეწურებოდა, რის გამოც იყო ალბათობა იმისა, რომ ის ციხეს დატოვებდა, თუმცა გუშინ პროკუარტურამ გიორგი ოქროპირიძეს ახალი ბრალდება წაუყენა.
ახალი ბრალდების შესახებ სხდომა საქალაქო სასამართლოში ამ წუთებში მიმდინარეობს.
