იუსტიციის მინისტრი თეა წულუკიანი რაიონული მოსამართლეებისათვის უფლებამოსოლების დასრულების შესახებ გადაწყვეტილებას, ვენეციის კომისიის რეკომენდაციით ხსნის და ირაკლი ალასანიას განცხადებას, რომ ყოფილი პრემიერ-მინისტრი მოსამართლეებს გაურიგდა, სპეკულაციას უწოდებს.
წულუკიანის მტკიცებით, საერთო სასამართლოების კანონში დაგეგმილი ცვლილება, რომელიც 25 რაიონული მოსამართლის ავტომატურ გათავისუფლებას ითვალისწინებდა, მისი გადაწყვეტილებით შეჩერდა და ე.წ. კაბელების საქმესტან ამას კავშირი არა აქვს.
"მე არ ვიცი, რა ტიპის სპეკულაციებზეა საუბარი და ვერანაირ კავშირს ვერ ვხედავ კაბელების საქმესთან. ეს ჩემი გადაწყვეტილებაა და არავისი სხვისი. რომ ვენეციის კომისიის შენიშვნას დავეთანხმო. ეს არის კომისიის შენიშვნა და რაკი ქალბატონ ნინო გვენეტაძესაც ეს მოთხოვნა ჰქონდა, გადავწყვიტეთ, დავასრულებინოთ თავმჯდომარეებს თავიანთი უფლებამოსილების ვადა და შემდეგ მოხდეს ახალი თავმჯდომარეების არჩევა" - თქვა წულუკიანმა.
შეგახსენებთ, რომ თავისუფალი დემოკრატების ლიდერის ირაკლი ალასანიას ინფორმაციით, ბიძინა ივანიშვილი რამდენიმე მოსამართლეს საიდუმლოდ შეხვდა, სადაც შეთანხმდნენ, რომ მოსამართლეები გარკვეული საკანონმდებლო ცვლილებების შეჩერების სანაცვლოდ, ე.წ. კაბელების საქმეზე, ივანიშვილისთვის სასურველ გადაწყვეტილებას გამოიტანენ. გავრცელებული ინფორმაციით, შეხვედრა პარასკევ საღამოს გაიმართა და მას სამი მოსამართლე ესწრებოდა - ლევან მურუსიძე, მიხეილ ჩინჩალაძე და ვალერი ცერცვაძე.
