უკრაინის ჯანდაცვის მინისტრი ალექსანდრე კვიტაშვილი არ არის დარწმუნებული, რომ მის მიერ გატარებული რეფორმის შემდეგ, მინისტრთა კაბინეტში დარჩება.
უკრაინული გამოცემა „segodnya.ua“ -ს ინფორმაციით, მინისტრი კვიტაშვილი დარწმუნებულია, რომ თუ სამედიცინო რეფორმა წარმატებული იქნება, მისი გუნდი მინისტთა კაბინეტის შემადგენლობაში დარჩება. თუმცა, არ გამორიცხავს, რეფორმის წარუმატებლობის შემთხვევაში, ვიღაც შეცვალონ.
„მინისტრთა კაბინეტის როტაცია აუცილებელია. ასეთი ცვლილება ამსოლუტურად ნორმალური მოვლენაა. ეს არც რომელიმე მინისტრის პირადი ტრაგედიაა და არც ქვეყნისთვის. მნიშვნელოვანია, რომ ახალმა მოსულმა მინისტრებმა განაგრძონ თავიანთი წინამორბედების რეფორმების ხაზი, “ - განაცხადა კვიტაშვილმა და დასძინა, რომ მთავარია მთავრობის მუშაობა და არა ის, თუ ვინ ასრულებს ამ სამუშაოს.
მინისტრის ინფორმაციით, ამჟამად პარლამენტში შესულია კანონპროექტი სამედიცინო პუნქტების რეფორმასთან დაკავშირებით.
უკრაინის პარლამენტში რამდენიმე დეპუტატმა არაერთხელ მოითხოვა ალექსანდრე კვიტაშვილის მინისტრის თანამდებობიდან გადაყენება. რამდენიმე დღის წინ, უკრაინის პრემიერ-მინისტრმა არსენი იაცენიუკმა მინისტრს სამთვიანი ვადა მისცა კონკრეტული შედეგის დასადებად.
ქვეყანაში, ბოლო დროს, მედიკამენტების დეფიციტის შექმნასა და დაჭრილი მეომრების არასათანადო მომსახურებაში, უკრაინელები ჯანდაცვის მინისტრს ადანაშაულებენ.
