,,ნაციონალური მოძრაობაში” მიიჩნევენ, რომ ნაფიცი მსაჯულების ინსტიტუტის დისკრედიტაციის ხარჯზე ხელისუფლება პოლიტიკურ პიარს ეწევა. ოპოზიციონერმა დეპუტატმა ლევან ბეჟაშვილმა, ლაშა მახარაძის მკვლელობის საქმეზე პრემიერის დღევანდელი განცხადების კომენტირებისას აღნიშნა, რომ ხელისუფლება ამ საქმეზე დაინტერესებულია კონკრეტული შედეგებით.
მისი თქმით, მახარაძის მკვლელობის საქმეზე კონკრეტული მტკიცებულებების შეგროვება და გამოძიების ობიექტურად წარმართვა სირთულეს არ წარმოადგენდა.
"ფაქტია, რომ ხელისუფლება ინსტიტუტების დისკრედიტაციის ხარჯზე ეწევა პოლიტიკურ პიარს და ცდილობს ნაფიცი მსაჯულების ინსტიტუტის დისკრედიტაციას. ასევე ფაქტია, რომ ერთ-ერთ ყველაზე ნათელ კრიმინალურ საქმესთან დაკავშირებით, პროკურატურა იმდენად უსუსურია და იმდენად უნიათობას ავლენს, რომ ვერ შეძლო კონკრეტული მტკიცებულებების შეგროვება და გამოძიების ობიექტურად წარმართვა, იმისთვის, რომ არც დაზარალებულებს, არც ბრალდებულს, არც საზოგადოებას ამ საქმესთან დაკავშირებით კითხვის ნიშნები არ ჰქონოდა. შესაბამისად, იკვეთება ხელისუფლების დაინტერესება ამ კონკრეტულ საქმესთან დაკავშირებით, იმიტომ, რომ მათი აქტივისტებიც ფიგურირებენ ამ საქმეში. არ არის გამორიცხული სწორედ პოლიტიკური მიზნებისთვის ხდებოდა არასწორი გზით წაყვანა და გამოძიება, ანუ აქ არის მთელი კომპლექსი ფაქტებისა, როდესაც ხელისუფლება დაინტერესებულია კონკრეტული შედეგებით" - თქვა ბეჟაშვილმა.
ცნობისთვის, ლაშა მახარაძის მკვლელობის საქმეზე ნაფიცმა მსაჯულებმა გადაწყვეტილება ვერ მიიღეს. მოსამართლემ ნაფიც მსაჯულთა ახალი შემადგენლობის ასარჩევად სხდომა 10 ივნისს, 12:00-ზე ჩანიშნა. იმ შემთხვევაში, თუ ნაფიც მსაჯულთა ახალი შემადგენლობაც ვერ მოახერხებს ვერდიქტის მიღებას, მაშინ გიორგი ოქროპირიძე გამართლებულად ჩაითვლება. თუმცა, ბრალდებულმა შესაძლოა, საპატიმრო დაწესებულება მანამდე დატოვოს, რადგან პატიმრობის 9-თვიანი ვადა 12 ივნისს ეწურება.
საქართველოს პრემიერ-მინისტრმა დღეს განაცხადა, რომ ნაფიცი მსაჯულების ინსტიტუტმა სრული კრახი განიცადა.
