თურქეთში, სირიის საზღვართან მდებარე პროვინცია შანლიურფას საარჩევნო უბანთან, ხელჩართული ჩხუბი მოხდა. ადგილობრივი ტელევიზიის ინფორმაციით, შედეგად 15 ადამიანი დაშავდა, რომლებიც საავადმყოფოში გადაიყვანეს.
საარჩევნო უბანთან დაწყებული კამათი ფართომასშტაბიან დაპირისპირებაში გადაიზარდა, რომლის დროსაც მხარეებმა ქვები, დანები და ხელჯოხები გამოიყენეს.
ადგილზე მყოფმა სამართალდამცავებმა დაპირისპირებული მხარეების გაშველება ვერ მოახერხეს, რის გამოც დამატებითი ძალების მობილიზება გახდა აუცილებელი. ერთი საათის განმავლობაში საარჩევნო უბანი დაიკეტა.
თურქეთში, დღეს საპარლამენტო არჩევნები მიმდინარეობს. თურქული მედიისცნობით, არჩევნებში დაახლოებით 20-მდე პარტია მონაწილეობს და მთავარი ინტრიგა იმაში მდგომარეობს, შეძლებს თუ არა მმართველი, "სამართლიანობისა და განვითარების პარტია" იმ რაოდენობის მანდატის მოპოვებას, რომ მთავრობა ჩამოაყალიბოს.
თურქეთის 56-მილიონიანი მოსახლეობა პარლამენტში 550 დეპუტატს ირჩევს. პარტიებს დღეს 10%-იანი ბარიერის გადალახვა მოუწევთ.
