უკრაინის პრეზიდენტი პეტრო პოროშენკო გამორიცხავს იმის შესაძლებლობას, რომ დონბასის გამოყოფის შესახებ რეფერენდუმის ჩატარებას დათანხმდება. ამის თაობაზე პოროშენკომ დღეს კიევში გამართულ პრეს-კონფერენციაზე განაცხადა.
,,დონბასის უკრაინიდან გამოყოფის საკითხი არის პროვოკაცია. მე, როგორც პრეზიდენტი, როგორც უმაღლესი მთავარსარდალი, როგორც კონსტიტუციის დამცველი, ვარ უკრაინის ტერიტორიული მთლიანობის გარანტი და არასოდეს დავუშვებ, რომ დონბასის გამოყოფის შესახებ რეფერენდუმი ჩატარდეს.” - აღნიშნა უკრაინის პრეზიდენტმა.
რაც შეეხება ადგილობრივი თვითმართველობის რეჟიმს, მისი თქმით, თუ ამ მხრივ კონსტიტუციური ცვლილებები გახდება საჭირო, არსებობს შესაბამისი პროცედურები, მათ შორის, რეფერენდუმის გზაც და ის ყველა უკრაინელს მისცემს აზრის გამოხატვის საშუალებას, რათა ერთად გადაწყვიტონ, როგორ ხედავენ ისინი დონბასის მომავალს.
