,,ნაციონალურ მოძრაობაში” მიიჩნევენ, რომ ბიძინა ივანიშვილმა კიდევ ერთხელ დაადასტურა, როგორ წყვეტს ვინ დაიჭირონ ქვეყანაში და ვინ გაათავისუფლონ.
პარტიის საერთაშორისო ურთიერთობათა მდივანი გიგა ბოკერია, ყოფილი პრემიერ-მინისტრის გუშინდელ განცხადებას სებ-ის პრეზიდენტთან დაკავშირებით ეხმიანება და აღნიშნავს, რომ ივანიშვილი ცდილობს ქვეყნის უფსკრულში გადაჩეხვას.
"ივანიშვილმა თავის მარიონეტებთან ერთად, სამი წლის განმავლობაში დაანგრია ეკონომიკა, გაზარდა სიღარიბე, უმუშევრობა, გააუფასურა ლარი და ჩვენ შარში გახვევას მუდმივად აგრძელებს. პირდაპირ თქვა, რომ თვითონ წყვეტს ვინ უნდა დაიჭიროს და ვინ არა, რაც ისედაც ვიცოდით, ამით ერთობა ეს კაცი. ახლა ქვეყნის შიგნით ეროვნული ბანკის, როგორც ინსტიტუტის დანგრევა უნდა და გარეთ სავალუტო ფონდთან არის კონფლიქტში მთავარ მასტაბილიზირებელ ფაქტორთან. ბოლომდე უნდა, რომ უფსკრულში გადაგვჩეხოს. ამიტომაა ჩვენი საზოგადოების გადაუდებელი ამოცანა, რომ რაც შეიძლება სწრაფად, მშვიდობიანად და კონსტიტუციური გზით, ეს კაცი ხელისუფლებას ჩამოაშოროს და გამოცვალოს მისი არაკომპეტენტური მარიონეტების გუნდი", - განაცხადა გიგა ბოკერიამ საქართველოს ყოფილი პრემიერ-მინისტრის განცხადებასთან დაკავშირებით, რომელმაც აღნიშნა, რომ მან საერთაქშორისო სავალუტო ფონდის თხოვნის საფუძველზე გიორგი ქადაგიძის დაჭერა გადაიფიქრა და რომ მან ქადაგიძეს ,,პირადი” აპატია.
