უკრაინის პრეზიდენტი პეტრო პოროშენკო კიევში ლგბტ პირთა მიერ ,,თანასწორობის მარშის” მოწყობის აკრძალვის ვერავითარ საფუძველს ვერ ხედავს. ამის შესახებ მან დღეს გამართულ პრეს-კონფერენციაზე განაცხადა.
,,მე არ მივიღემ მარშში მონაწილეობას, თუკი თქვენ ეს გაინტერესებთ, მაგრამ მე ვერ ვხედავ ვერავითარ მიზეზს იმისათვის, რომ ამ აქციას ხელი ვინმემ შეუშალოს. ვინაიდან ეს არის უკრაინის ნებისმიერი მოქალაქის კონსტიტუციური უფლება”, - უთხრა მან ჟურნალისტებს.
ამასთან, აღნიშნა, რომ მას თავისი ქრისტიანული ღირებულებები გააჩნია, რომლითაც თავადაც გაიზარდა და შვილებიც აღზარდა, მაგრამ ლგბტ პირთა მიერ ამ ღონისძიების ჩატარების მცდელობით, ცალკეულ პოლიტიკურ ძალთა აღშფოთებას არ იზიარებს.
პოროშენკოს თქმით, ზოგიერთ პოლიტიკოსს ამ თემით უბრალოდ პიარის გაკეთება სურს.
აღნიშნულ საკითხზე, 4 ივნისს, განცხადება კიევის მერიის პრესსამსახურმა გაავრცელა, სადაც კიევის მერმა ვიტალი კლიჩკომ პოლიტიკურ ძალებსა და საზოგადოებრივ ორგანიზაციებს მოუწოდა, არ გაეღვივებინათ შუღლი და უკრაინის დედაქალაქში ლგბტ პირთა მარშის ჩატარების გამო მორიგი დაპირისპირება არ შეექმნათ.
,,დღეს, როდესაც აღმოსავლეთ უკრაინაში მიმდინარეობს ომი, მასობრივი ღონისძიებების გამართვა, რომელზეც საზოგადოებას არაერთგვაროვანი დამოკიდებულება აქვს, არადროულია. ჩვენ ამ მომენტისთვის გვყავს ერთი მტერი - საომარი ორგანიზაცია აღმოსავლეთში. ამიტომ, მოვუწოდებ ყველას, არ შეუწყონ ხელი მტერს, ნუ შევქმნით ახალ დაპირისპირებას დედაქალაქის ცენტრში” - აცხადებს კლიჩკო.
მან აღნიშნა, რომ კიევში არ არსებობს შეზღუდვა და ყველა ადამიანის გამოხატვის თავისუფლება გარანტირებულია . ამავე დროს, ,,თანასწორობის მარში” მშვიდობიან პერიოდშიც წევდა დაძაბულობის ტემპერატურას საზოგადოებაში, იწვევდა კამათს და მიმდინარეობდა წინააღმდეგობებითა და ჩხუბით.
,,ამის გათვალისწინებით, არსებობს პროვოკაციების საშიშროება დედაქალაქში. ამიტომ, მივმართავ ორგანიზაციებს შეიკავონ თავი მსგავსი ღონისძიებების ჩატარებისგან. ქალაქის უსაფრთხოება უმთავრესია” - აღნიშნა მერმა.
მან ასევე მოუწოდა პოლიტიკურ ძალებს, ნუ გააკეთებენ საეჭვო პიარსა და სპეკულაციას უმცირესობების უფლებებთან დაკავშირებით.
შეგახსენებთ, 6 ივნისს ლგპტ ორგანიზაცია კიევში ,,თანასწორობის მარშის” გამართვას გეგმავს. აღნიშნულ აქციას ,,მემარცხენე სექტორი” დაშლით ემუქრება.
