საერთაშორისო სავალუტო ფონდის მისიის ხელმძღვანელი საქართველოში აზიმ სადიკოვი საქართველოს ყოფილი პრემიერის, ბიძინა ივანიშვილის გუშინდელ განცხადებასთან დაკავშირებით, ოფიციალურ განცხადებას ავრცელებს.
,,საერთაშორისო სავალუტო ფონდს არ გამოუთქვამს და ვერც მომავალში გამოთქვამს საკუთარ მოსაზრებას ცალკეული ქვეყნის სამართალწარმოებაზე ან ერთეული პირის კანონთან მიმართებაზე. ეს ჩვენი მანდატი არ გახლავთ”, - ნათქვამია განცხადებაში.
აქვე აღნიშნულია, რომ საერთაშორისო სავალუტო ფონდისგან დახმარების პროგრამების მხარდაჭერა, განპირობებულია ეროვნული ბანკის დამოუკიდებლობით. სადიკოვი წუხილს გამოთქვამს ,,ეროვნული ბანკის შესახებ” კანონში დაგეგმილ ცვლილებებთან დაკავშირებით.
"საქართველოს ხელისუფლებასთან დიალოგისას, საერთაშორისო სავალუტო ფონდმა არაერთხელ აღნიშნა საქართველოს ეროვნული ბანკის დამოუკიდებლობის დაცვისა და შენარჩუნების მნიშვნელობა. საქართველოს ეროვნული ბანკის დამოუკიდებლობის შელახვა შეასუსტებს ამ ინსტიტუტს, ძირს გამოუთხრის მის სავალუტო და ფინანსური პოლიტიკის სანდოობას და საფრთხეს შეუქმნის ინვესტორთა ნდობას. საქართველოს ხელისუფლებამ არაერთხელ დაადასტურა ეროვნული ბანკის დამოუკიდებლობისადმი ერთგულება. ყოველივე ამან განაპირობა, რომ საერთაშორისო სავალუტო ფონდი მხარს უჭერს საქართველოს ეკონომიკური დახმარების პროგრამებს. საერთაშორისო სავალუტო ფონდი შეშფოთებას გამოთქვამს, ბოლო პერიოდში ეროვნული ბანკის კანონმდებლობაში ცვლილებების შეტანასთან დაკავშირებით გაკეთებული შეთავაზების გამო, რომელიც რისკის ქვეშ დააყენებს ეროვნული ბანკის დამოუკიდებლობას. ჩვენი რეკომენდაციაა, ახლავე გაიმართოს სწორი კონსულტაციები ყველა დაინტერესებულ მხარესთან და საერთაშორისო ექსპერტებთან”, - ნათქვამია განცხადებაში.
აზიმ სადიკოვი ასევე აღნიშნავს, რომ თუ ცვლილებები მაინც გადაწყდება, ამან ეროვნული ბანკის დაკმოუკიდებლობა უნდა უზრუნველყოს. მისივე თქმით, საერთაშორისო სავალუტო ფონდი მზადყოფნას გამოთქვამს, გაუწიოს დახმარება ამ სფეროში.
ბიძინა ივანიშვილმა გუშინ განაცხადა, რომ საერთაშორისო სავალუტო ფონდის წარმომადგენელმა სთხოვა, ეროვნული ბანკის პრეზიდენტი გიორგი ქადაგიძე არ დაეკავებინათ და ეს თხოვნა გაითვალისწინა.
