საქართველოს პარლამენტის თავმჯდომარის დავით უსუფაშვილის შეფასებით, პროკურატურაში რეფორმის გატარებისას მმართველ კოალიციას „ზედმეტი მოუვიდა“ და „პროკურატურა ჰაერში გამოეკიდა“. ამის შესახებ უსუფაშვილმა გადაცემა „2030“-ში განაცხადა. გარდა ამისა, პარლამენტის თავმჯდომარემ წუხილით აღნიშნა, რომ წლების მანძილზე, ბევრი საქართველოს მოქალაქე იყო „ტანჯული პროკურატურის მხრიდან“.
„პროკურატურის სისტემა იყო აბსოლუტურად გაუმართავი [2012 წლამდე].მივიღეთ გადაწყვეტილება პროკურატურის და იუსტიციის სამინისტროს შორის დისტანცირების თაობაზე, მაგრამ ზედმეტი მოგვივიდა და პროკურატურა ჰაერში გამოეკიდა, იმიტომ რომ ერთის მხრივ იუსტიციის მინისტრის როლი ამ საკითხში სიმბოლურ დონემდე დავიდა, მეორეს მხრივ - პროკურატურა არავის მიმართ ანგარიშვალდებული არ აღმოჩნდა, და გაუგებარი მდგომარეობა მივიღეთ“, - განაცხადა უსუფაშვილმა.
ამასთანავე საკანომდებლო ორგანოს თავმჯდომარემ ახალ კანონპროექტზე საუბრისას აღნიშნა, რომ მისი მიღების შემდეგ „პროკურატურის დამოუკიდებლობის ხარისხი გაიზრდება და პოლიტიზირების ხარისხი შემცირდება“.
