რუსეთზე ზეწოლის პოლიტიკამ თავისი თავი უკვე ამოწურა. უკვე დროა კონსტრუქტიულ დიალოგზე გადავიდეთ, რათა უკრაინაში შექმნილი და მთელი ევროპისთვის საშიში ვითარებიდან გამოსავალი ვიპოვოთ. ამის შესახებ გერმანიის საგარეო საქმეთა მინისტრმა ფრანკ-ვალტერ შტაინმაიერმა დღეს გაზეთ ,,Neue Ostanbrücker Zeitung” - თან ინტერვიუში განაცხადა.
,,როგორც ჩვენს ევროპულ რეგიონში არსებული გაყინული კონფლიქტების, ისე სირიაში, ერაყსა და ლიბიაში მიმდინარე მოვლენების, ასევე ირანის ბირთვული პროგრამის მოგვარების საკითხებში ჩვენ რუსეთი გვჭირდება.” - აღნიშნა შტაინმაიერმა.
მისი აზრით, რუსეთთან დაკავშირებით მხოლოდ პოლიტიკურ ზეწოლაზე ფსონების დადება უშედეგოა. ამიტომ, აუცილებელია დიალოგი, რათა უკრაინაში შექმნილი და მთელი ევროპისთვის საშიში ვითარებიდან გამოსავალი მოიძებნოს.
გერმანიის საგარეო უწყების ხელმძღვანელმა ასევე აღნიშნა, რომ მოსკოვის წინააღმდეგ ახალი სანქციების შემოღება უაზრობაა, რადგან ეს ვითარების კიდევ უფრო დაძაბვას გამოიწვევს.
შეგახსენებთ, რომ ე. წ. ,,დიდი შვიდიანის” შეხვედრა 7-8 ივნისს ბავარიაში გაიმართება და ფორუმზე ეკონომიკის, გეოპოლიტიკის, საერთაშორისო პოლიტიკის, გლობალური დათბობისა და საერთაშორისო ტერორიზმთან ბრძოლის საკითხები განიხილება. საუბარი უკრაინაში მიმდინარე მოვლენებსაც შეეხება.
