პრემიერ-მინისტრი ირაკლი ღარიბაშვილი მარიხუანას დეკრიმინალიზაციის კატეგორიული წინააღმდეგია. ამის შესახებ მან მთავრობის დღევანდელ სხდომაზე განაცხადა და ასევე აღნიშნა, რომ მმართველ გუნდში ამს საკითხზე საერთო აზრი არ არსებობს.
პრემიერის განცხადებით, მარიხუანას დეკრიმინალიზაცია გამოიწვევს ნარკოპოლიტიკის მთლიანად გადახედვის აუცილებლობას, რაც შესაძლოა მომავალი თაობებისთვის სავალალო შედეგების მომტანი გახდეს.
,,მარიხუანას დეკრიმინალიზაციაზე პირადად მე მკვეთრად უარყოფითი დამოკიდებულება მაქვს და გუნდში, ვიცი, რომ ამ საკითხზე საერთო აზრი არ არის. ეს იქნება ჩვენი ნარკოპოლიტიკის აბსოლუტურად გადახედვა. ამიტომ შედეგებს სჭირდება ძალიან კარგი გააზრება. ახალგაზრდები ამ საკითხზე ემოციურად საუბრობენ, მაგრამ ეს არის ძალიან პრინციპული თემა. ჩვენ ვალდებულები ვართ, სავალალო შედეგებზე დავფიქრდეთ და გავიაზროთ. უნდა ვიმსჯელოთ იმაზე, თუ როგორ შევუქმნათ ახალგაზრდებს ბედნიერი მომავალი. უნდა ვიფიქროთ მათი ჯანსაღი ცხოვრების წესზე და არა მარიხუანას დეკრიმინალიზაციაზე, რასაც შემდგომ შესაძლოა, მოჰყვეს მისი ლეგალიზაციის მოთხოვნა და საბოლოოდ მივიღებთ მომავალი თაობებისთვის სავალალო შედეგებს. სამწუხაროა, რომ საზოგადოება არ საუბრობს მთის განვითარებაზე, დემოგრაფიის საკითხებზე, რაც ჩვენთვის ყველაზე მნიშვნელოვანი უნდა იყოს და საუბრობენ იმაზე, რომ თავისუფლად მოსწიონ ქუჩებში მარიხუანა. ვისაც სურს, თუ ასე ძალიან უნდათ, ეს მოუწოდონ თავიანთ შვილებს", - აღნიშნა პრემიერმა და აქვე განმარტა, რომ მარიხუანას პირველ მოხმარებაზე,საქართველოს კანონმდებლობით, 500 ლარიანი ჯარიმაა გათვალისწინებული და არა სისხლის სამართლის პასუხისმგებლობა.
