საპარლამენტო უმრავლესობის წევრი დავით ბერძენიშვილი არ მოელის, რომ პრეზიდენტი მიხეილ სააკაშვილს საქართველოს მოქალაქეობას მიანიჭებს.
მისი განცხადებით, გიორგი მარგველაშვილმა თავისი პოზიცია საკმაოდ მკვეთრად, უკვე გამოხატა.
,,პრეზიდენტმა გიორგი მარგველაშვილმა განაცხადა, რომ არის უკიდურესად უკმაყოფილო. მე არ ველოდები, რომ ის მიანიჭებს სააკაშვილს საქართველოს მოქალაქეობას - ქვეყნის წინაშე განსაკუთრებულ დამსახურებად ვერ ჩაითვლება ოდესის გუბერნატორობა ქვეყნის ყოფილი პრეზიდენტისგან, ამიტომ ის აღარ იქნება საქართველოს მოქალაქე ძალიან მაღალი ალბათობით. მან გააკეთა ეს არჩევანი, როდესაც მან მშვენივრად იცის, რომ საქართველოს კანონმდებლობა არ უშვებს ორმაგ მოქალაქეობას გარდა იმ შემთხვევისა, როცა პრეზიდენტი მიანიჭებს სხვა ქვეყნის მოქალაქეს ქვეყნის წინაშე განსაკუთრებული დამსახურებისთვის. მას არ ემუქრება ჩემი შთაბეჭდილებით ის, რომ მარგველაშვილი დააპირებს სააკაშვილისთვის მოქალაქეობის მინიჭებას და შეუფასებს ოდესის გუბერნატორობისკენ გადადგმულ ნაბიჯებს ქვეყნის წინაშე განსაკუთრებულ დამსახურებად”, - განაცხადა ბერძენიშვილმა.
შეგახსენებთ, უკრაინის პრეზიდენტმა პეტრე პოროშენკომ საქართველოს ექსპრეზიდენტს მოქალაქეობა მიანიშა და ოდესის ოლქის გუბერნატორად დანიშნა. ,,ნაციონალურ მოძრაობაში” მიიჩნევენ, რომ გიორგი მარგველაშვილმა უნდა გამოიყენოს კანონით მინიჭებული უფლება და სააკაშვილს ორი წლით მოქალაქეობა შეუნარჩუნოს ან აღუდგინოს.
