თავდაცვის მინისტრის თინა ხიდაშელის თქმით, საქართველოს ყოფილმა პრეზიდენტმა მიხეილ სააკაშვილმა უკრაინის მოქალაქეობის მიღებით საბოლოოდ დაადასტურა, რომ „ის არის წარსული და ის არასოდეს აღარ დაბრუნდება“. ასეთი სიტყვებით უპასუხა თინა ხიდაშელმა „2030“-ის ჟურნალისტს კითხვაზე მე-3 პრეზიდენტის თაობაზე.
„სააკაშვილი არის წარსული ჩემი ქვეყნისთვის. 2012 წლის 1 ოქტომბერს საქართველოს მოსახლეობამ ის წარსულად აქცია; და თავისი პარასკევის გადაწყვეტილებით [უკრაინის მოქალაქეობის მიღებით] მან საბოლოოდ თქვა, რომ ის არის წარსული და ის არასოდეს აღარ დაბრუნდება. ამიტომ მე არ მაინტერესებს მიხეილ სააკაშვილი“, - უპასუხა მინისტრმა ჟურნალისტს და დაამატა: „ამ კითხვით რა მშვენიერი დღე გამიფუჭეთ. რა დროს მიხეილ სააკაშვილი იყო?!“
ამასთანავე თინა ხიდაშელმა თავი შეიკავა პასუხისგან კითხვაზე მიხეილ სააკაშვილის ექსტრადიციასთან დაკავშირებით.
„კი ვარ პროფესიით იურისტი, მაგრამ ვამჯობინებდი, რომ სხვა იურისტებმა და პოლიტიკოსებმა, რომლებსაც საუბრის უფრო ფართო დიაპზონი აქვთ, მათ უნდა ისაუბრონ. მე საკმაოდ შეზღუდული ვარ ჩემი თანამდებობიდან გამომდინარე“. - აღნიშნა თავდაცვის მინისტრმა.
