საქართველოს საგარეო საქმეთა მინისტრი თამარ ბერუჩაშვილი იმედოვნებს, რომ ევროპის საბჭოს ადამიანის უფლებათა დაცვის კომისარს პირველად ექნება შესაძლებლობა, საქართველოს ოკუპირებულ ტერიტორიებზე შევიდეს. ამის შესახებ ბერუჩაშვილმა ჟურნალისტებს დღეს დიპლომატებთან შეხვედრის შემდეგ განუცხადა, სადაც საგარეო საქმეთა სამინისტრომ შერიგებისა და სამოქალაქო თანასწორობის საკითხებში სახელმწიფო მინისტრის აპარატთან ერთად დიპლომატებს ოკუპირებულ ტერიტორიებზე ადამიანის უფლებათა მდგომარეობის შესახებ ანგარიში წარუდგინა.
,,ეს არის კონკრეტული ფაქტები, აღწერილობა იმ დარღვევების, რომელიც ყოველდღიურად მიმდინარეობს ოკუპირებულ ტერიტორიებზე. ჩვენი ამოცანაა რეგულარულად მივაწოდოთ დეტალური ინფორმაცია ჩვენს საერთაშორისო პარტნიორებს და მათი ყურადღებისა და მხარდაჭერის მაქსიმალური მობილიზება მოვახდინოთ ამ საკითხთან დაკავშირებით. როგორც მოგეხსენებათ, დღეს ოკუპირებული ტერიტორიები ეს არის შავი ხვრელები, როგორც გაეროს ყოფილმა ადამიანის უფლებათა დაცვის კომისარმა ამ ტერიტორიებს უწოდა. ეს არის 21-ე საუკუნეში ყველაზე უფრო რთულად შეღწევადი ტერიტორიები დედამიწის ზურგზე. ჩვენი ამოცანაა, ვიმუშაოთ აქტიურად, გამოვიყენოთ ყველა საერთაშორისო ფორმატი და მოვახდინოთ საერთაშორისო თანამეგობრობის მობილიზება, რომ ეს სიტუაცია შეიცვალოს", - აღნიშნა მინისტრმა.
მისივე თქმით, პირველი ასეთი ნაბიჯი იყო ევროპის საბჭოს მინისტრთა მოადგილეების კომიტეტის გადაწყვეტილება, რომელმაც პირველად მკაფიოდ მოუწოდა რუსეთის ფედერაციას აღნიშნულ ტერიტორიებზე საერთაშორისო დამკვირვებლების უპირობო შეღწევა უზრუნველეყო.
"რამდენიმე თვის შემდეგ ჩვენ ველით ევროპის საბჭოსა და ადამიანის უფლებათა კომისარს საქართველოში და მე იმედი მაქვს, რომ ეს იქნება პირველი შემთხვევა, როცა იგი მოახერხებს მოლაპარაკებას და შეუფერხებლად შეღწევას ამ ტერიტორიაზე", - განაცხადა თამარ ბერუჩაშვილმა.
