საპარლამენტო უმრავლესობის წევრი გედევან ფოფხაძე უკრაინას მიხეილ სააკაშვილის გამო თანაუგრძნობს. როგორც მან ექსპრეზიდენტის ოდესის გუბერნატორად დანიშვნასთან დაკავშირებით ჟურნალისტებთან განაცხადა, უღელი, რომელიც საქართველომ მოიშორა უკრაინელებს დაადგეს.
,,სააკაშვილს ვულოცავ, მაგრამ ოდესელებს ვერ მივულოცავ ამ დალოცვილ დანიშვნას. საერთოდ ძალიან თანავუგრძნობ უკრაინელ ხალხსა და უკრაინას. ჩემთვის ძალიან მნიშვნელოვანია უკრაინელების ბედი და ძალიან ვწუხვარ, რომ ხალხი, რომელიც უღელად ადგა ქართველ ხალხს და მოვიშორეთ ეს უღელი, ახლა ეს უღელი დაადგეს უკრაინელებს. უკრაინაში გაირკვევა პოლიტიკური სპექტრი, მალე გაირკვევა, თუ რა სჭირდება უკრაინას და შესაბამისად სააკაშვილიც ისეთ ნავსაყუდელს ნახავს, რასაც ის იმსახურებს”, - განაცხადა დეპუტატმა.
შეგახსენებთ, მიხეილ სააკაშვილს უკრაინის პრეზიდენტმა პეტრო პოროშენკომ მოქალაქეობა მიანიჭა და ოდესის ოლქის გუბერნატორად დანიშნა.
