4-6 ივნისს საქართველოს საგარეო საქმეთა მინისტრი თამარ ბერუჩაშვილი ოფიციალური ვიზიტით მონტენეგროს ეწვევა.
ამის შესახებ დღეს გამართულ ტრადიციულ პრესკონფერენციაზე საგარეო საქმეთა სამინისტროს სპიკერმა დავით კერესელიძემ განაცხადა. მისივე ინფორმაციით, ვიზიტის ფარგლებში დაგეგმილია თამარ ბერუჩაშვილის შეხვედრები თავის კოლეგასთან იგორ ლუკსიჩთან, საკანონმდებლო და აღმასრულებელი ხელისუფლების წარმომადგენლებთან. ვიზიტის ფარგლებში საგარეო საქმეთა მინისტრი მონაწილეობას მიიღებს მაღალი დონის უსაფრთხოების ფორუმში.
როგორც დავით კერესელიძემ აღნიშნა, ეს არის მონტენეგროში საგარეო საქმეთა მინისტრის პირველი ოფიციალური ვიზიტი, რაც საფუძველს დაუდებს ორ ქვეყანას შორის მჭიდრო ურთიერთობის ჩამოყალიბებასა და ორმხრივი ურთიერთობების გაღრმავებას.
"ვიზიტი ასევე დამატებით მნიშვნელობას იძენს ნატო-ს ასპირანტი ქვეყნების ფორმატში თანამშრომლობის კუთხით", - დასძინა კერესელიძემ.
