უკრაინის იუსტიციის მინისტრის მოადგილის გია გეწაძის შეფასებით, მიხეილ სააკაშვილის დანიშვნა ოდესის ოლქის გუბერნატორის პოსტზე - ეს არის დარტყმა პუტინის რეჟიმისთვის. ამის შესახებ გია გეწაძემ „იმედის კვირის“ ეთერში განაცხადა.
„მიხეილ სააკაშვილის მთავარი ფუნქცია, მიზანი და ნაბიჯები, რომელსაც ის დგამს უკრაინაში, - ეს არის საქართველოს დეოკუპაციისთვის ზრუნვა. დღეს სარისკო იყო ოდესის ოლქში გუბერნატორობაზე დათანხმება, იმიტომ რომ ეს არის ფაქტობრივად ფრონტის ხაზი ოკუპანტ რუსეთთან და მეორეს მხვრივ, კორუმპირებული სისტემა, რომელსაც სჭირდება გაწმენდა და სწრაფი რეფორმები. ეს არის დარტყმა პუტინის რეჟიმისთვის მიხეილ სააკაშვილი ამ თანამდებობას რომ დათანხმდა“, - განაცხადა უკრაინის იუსტიციის მინისტრის მოადგილემ.
ამასთანავე გია გეწაძემ აღნიშნა, რომ ვერ შეაფასებს საქართველოს პრეზიდენტის და თავდაცვის მინისტრის უარყოფით კომენტარებს სააკაშვილის უკრაინის მოქალაქეობის მიღებასთან დაკავშირებით, რაც ავტომატურად აკარგვინებს მას საქართველოს მოქალაქეობას: „როგორც უკრაინის იუსტიციის მინისტრის მოადგილე მე ვერ ვუპასუხებ პრეზიდენტის და სხვა პოლიტიკოსების კომენტარებს. თუმცა მაქვს ჩემი მოსაზრება“.
