საქართველოს ყოფილი პრეზიდენტის და ამჟამად ახალდანიშნული ოდესის გუბერნატორის მიხეილ სააკაშვილის თქმით, თუ პუტინი უკრაინას მოსწყვეტს ზღვას, საქართველო შეიძლება გაქრეს მსოფლიო რუკიდან. ამის შესახებ მიხეილ სააკაშვილმა „იმედის კვირაში“ განაცხადა.
„საქართველოს ბედი წყდება უკრაინაში, ხოლო უკრაინისბედი მეტწილად წყდება ამ რეგიონში [ოდესის ოლქში]. თუ ამ რეგიონში შენარჩუნდება სიმშვიდე, თუ აქ არ აღსრულდა პუტინის გეგმები, რომ უკრაინა მოწყვიტოს ზღვას... თუ ეს მოხდება, ღმერთმა არ ქნას, საქართველო შეიძლება გაქრეს მსოფლიო რუკიდან, იმიტომ რომ, თუ უკრაინას გადაეკეტა ზღვასთან მისასვლელი, საქართველოს ტვირთის უმეტესობა გადის აქ [ოდესის გავლით]... აქ წყდება ბევრი რამ. აქ იგივე მტრებია, რაც საქართველოში იყო, ზუსტად ისეთი გარემოებებია, როგორც ჩვენ გვქონდა 2004-ში. აქ შედეგის დადება ნიშნევს უკრაინის გადარჩენას, ესე იგი საქართველოს გადარჩენას“, - განაცხადა სააკაშვილმა.
ამასთანავე ყოფილმა პრეზიდენტმა აღნიშნა, რომ გარდამტეხ ცვლილებებს გეგმავს ოდესის ოლქში. მისი თქმით 27 რაიონის გამგებელი დატოვებს თანამდებობებს. ასევე პოსტებზე არ დარჩებიან საგადასახადო სამსახურების ხელმძღვანელები. მისი თქმით, ყველა სახელმწიფო მოხელე დაინიშნება კონკურსის წესით.
