ნაციონალური მოძრაობის საერთაშორისო მდივანი გიგა ბოკერია მიიჩნევს, რომ პარტიიდან გამიჯნულ ოთხეულს წასვლის მიზეზებზე არფერი აქვთ სათქმელი და ამიტომ არ საუბრობენ. როგორც მან ,,რუსთავი 2” -ში სტუმრობისას განაცხადა,
ბოლო მოვლენების მიუხედავად ენმ არ შეასუსტებს დემოკრატიულ წნეხს ხელისუფლებაზე.
,,დემოკრატიულ წესწყობილებაში პარტიიდან თუ მიდის ადამიანი, უნდა თქვას, რომ -აი, ამიტომ, ამ ღირებულებების გამო არ მივდივარ და ამას არ ვეთანხმებოდი. თუ საზოგადოებას არ ეუბნება მიზეზებს, აბსოლუტურად გაუგებარია - ე.ი. სათქმელი არაფერი არ აქვს და ამაშია სწორედ საქმე. ხომ არ იტყვის, რომ - ვერ გავუძელი, ვერ გავქაჩე, როგორც ლიდერმაო. ერთადერთი ეფექტი, რაც ნამდვილად დადგა ამ უპასუხისმგებლო ნაბიჯით, არის გაბრწყინებული სახე ღარიბაშვილის და მინისტრების, რომელიც ვნახეთ იმ დღეს. თუმცა, ამ ნაბიჯის შედეგად, არ უნდა ჰქონდეს არც ივანიშვილს და არც მის რეჟიმს იმედი, რომ ნაციონალური მოძრაობა შეასუსტებს იმ დემოკრატიულ წნეხს, რომელსაც ატარებდა და არ გააგრძელებს მუშაობას. ამ რეჟიმს არჩევნების გზით ჩამოვაშორებთ ხელისუფლებას”,- აცხადებს ბოკერია.
მისივე თქმით, თუ ლიდერი მიდის პარტიიდან მან მკაფიოდ უნდა დაასახელოს პრინციპული საკითხი, რის გამოც ასეთ ნაბიჯს დგამს.
..ჯაფარიძემ თქვა, რომ ნაციონალური მოძრაობისგან ღირებულებებით არ განსხვავდება; მან თქვა, რომ ახერხებდა ნაციონალურ მოძრაობას უმრავლეს თემებზე ის პოზიცია დაეკავებინა, რაც მას სწორად მიაჩნდა - აბა რატომ წავიდა? როდესაც პარტიის წევრი, მით უმეტეს ლიდერი, ნორმალურ ვითარებაში მიდის პარტიიდან, მას უნდა ჰქონდეს პრინციპული საკითხი, რომელსაც არ ეთანხმება - ამ შემთხვევაში პარტიიდან წასვლა, რა თქმა უნდა, შესაძლებელია, ეს დემოკრატიული ცხოვრების ნაწილია. უნდა ჰქონდეს პრინციპული საკითხი, უნდა დასვას ეს საკითხი, უნდა ეცადოს, რომ გაიტანოს საკუთარი პოლიტიკური გუნდის შიგნით ისე, როგორც ეს მას სწორად მიაჩნია ქვეყნისთვის. თუ ვერ გააქვს, მაშინ გაიაროს პროცედურა, პატივი სცეს მთელს პარტიას და ამის შემდეგ ნორმალურია გასვლა. არცერთი ამ პუნქტებიდან სახეზე არ არის. ამიტომ ბუნდოვანი, არადამაჯრებელი და პოლიტიკურად უსუსურია ეს ყველაფერი, რასაც ვისმენთ წერილობით და ზეპირად. დღეს არ ვართ ნორმალურ ვითარებაში. ვართ ვითარებაში, როდესაც ოლიგარქი მილიარდერი მიაქანებს უფსკრულისკენ ქვეყანას; როდესაც პოლიტიკური პარტიის ლიდერები არიან ციხეში და რეპრესიების ქვეშ. ასეთ დროს გაასმაგებულად პრინციპიული საკითხი უნდა არსებობდეს, რომ ასეთი ნაბიჯი გადადგას ადამიანმა. და საერთოდ, ძნელად წარმომიდგენია, როგორ უნდა გადადგას. თუ ღირებულებითი განსხვავება არ არის, გაჰქონდა ყველა საკითხი - კარგად ვმართავდიო, მაშინ როგორ შეიძლება პასუხიმგებლობის მქონე ლიდერის პირიდან მოვისმინოთ ეს” - განაცხადა გიგა ბოკერიამ.
