ერთიან ნაციონალურ მოძრაობაში მიიჩნევენ, რომ მაჟორიტარული საარჩევნო სისტემის გაუქმება აუცილებელია. როგორც ენმ-ის წევრმა ლევან ბეჟაშვილმა განაცხადა, დღეს ყველა პარტია, გარდა ,,ქართული ოცნებისა” მხარს უჭერს რეგიონალურ-პროპორციულ საარჩევნო სისტემაზე გადასვლის იდეას.
"აქტუალურია ის გადაწყვეტილება, რომელიც საკონსტიტუციო სასამართლომ მიიღო. თავისთავად, ის აუქმებს მაჟორიტარული საარჩევნო სისტემას და ამ შემთხვევაში პარლამენტს მიმართავს, რომ მიიღოს ადეკვატური გადაწყვეტილებები. ამ შემთხვევაში სამწუხაროდ დღეს, ასე ვთქვათ, ყველა პოლიტიკურ პარტიას აქვს რეგიონალურ-პროპორციული საარჩევნო სისტემის მხარდაჭერის სურვილი და ერთადერთი გამონაკლისი არის ქართული ოცნება, რომელსაც თავად ჰქონდა, თავიანთ პროგრამაში, რომ რეგიონალურ-პროპორციულ საარჩევნო სისტემას შემოიღებდა. დღეს მათ დაივიწყეს ეს პროგრამა და ასე ვთქვათ, ისევ ცდილობენ მაჟორიტარული საარჩევნო სისტემის შენარჩუნებას გარკვეული მოდიფიკაციებით. ამიტომ საკონსტიტუციო სასამართლოს ეს გადაწყვეტილებაც განმსაზღვრელი უნდა იყოს ამ რეფორმისა, რომელსაც ჰქვია საარჩევნო სისტემის რეფორმა.“ - განმარტავს ბეჟაშვილი და დასძენს, რომ ოლქების ახლებურად გადანაწილება არ წარმოადგენს სირთულეს და ეს პროცესი დაეხმარება ქვეყნის დემოკრატიზაციის პროცესს.
შეგახსენებთ, საკონსტიტუციო სასამართლომ არაკონსტიტუციურად ცნო საქართველოს საარჩევნო კოდექსის ის ნორმები, რომლებიც ადგენდა 73 ერთმანდატიანი მაჟორიტარული საარჩევნო ოლქის განსაზღვრის წესს. კერძოდ, სადავო ნორმების თანახმად, საპარლამენტო არჩევნებისთვის თითოეული მუნიციპალიტეტი, თბილისის გარდა, წარმოადგენდა ერთმანდატიან მაჟორიტარულ ოლქს, ხოლო თბილისში იქმნებოდა 10 მაჟორიტარული საარჩევნო ოლქი. საკონსტიტუციო სასამართლომ მიუთითა, რომ მაჟორიტარული საარჩევნო ოლქების საზღვრების დადგენისას მხედველობაში უნდა იქნეს მიღებული მუნუციპალიტეტებში რეგისტრირებული ამომრჩევლების რაოდენობა, ხოლო სახელმწიფოს ძალისხმევა მიმართული უნდა იყოს, შეძლებისდაგვარად, თანაბარი საარჩევნო ოლქების ჩამოყალიბების უზრუნველსაყოფად.
