საქართველოს პრეზიდენტის ადმინისტრაციაში საარჩევნო საკითხებთან დაკავშირებით შეხვედრა იმართება, რომელშიც არასაპარლამენტო და საპარლამენტო ოპოზიციის, ადგილობრივი და საერთაშორისო არასამთავრობო ორგანიზაციების წარმომადგენლები მონაწილეობენ.
როგორც შეხვედრის დაწყებამდე მათ განაცხადეს, პრეზიდენტთან დღევანდელი საუბრის ძირითადი თემა იქნება ორ დღეში დაგეგმილი საერთაშორისო კონფერენცია, რომელიც საარჩევნო საკითხებს შეეხება. მათივე თქმით, საუბარი ასევე შეეხება საკონსტიტუციო სასამართლოს გადაწყვეტილებასაც.
"უნდა შეიცვალოს ძალიან ბევრი რამ საარჩევნო საკითხებთან მიმართებაში. ამაზე საუბრობდნენ კოალიცია "ქართულ ოცნებაში" შემავალი პარტიები მაშინ, როდესაც იყვნენ ოპოზიციაში. ამაზე საუბრობდნენ არასამთავრობო ორგანიზაციები, ოპოზიციური საპარლამენტო და არასაპარლამენტო პარტიები. საკონსტიტუციო სასამართლომ მიიღო გადაწყვეტილება, რომ მანდატების ასეთი განაწილება არის არაკონსტიტუციური. პრეზიდენტი უშუალოდ ჩაერთო ამ პროცესებში, რაც ძალიან კარგია. ოპოზიციას შორის მთლიანობაში კონსენსუსი მიღწეულია, თუმცა გარკვეული დეტალებია შესათანხმებელი ყველა პოლიტიკურ ძალასთან და არასამთავრობო ორგანიზაციასთან. ყველა დაინტერესებული მხარე წარვდგებით ერთიანი პოზიციით. "ქართული ოცნება" მხარს არ უჭერს ამ პროცესს. ერთ მხარეს ვიდგებით ჩვენ ერთი პოზიციით, მეორე მხარეს კი "ქართული ოცნება", - განაცხადა ჟურნალისტებთან "თავისუფალი დემოკრატების" ერთ-ერთმა ლიდერმა ზურაბ აბაშიძემ.
საქართველოს საკონსტიტუციო სასამართლომ დააკმაყოფილა უჩა ნანუაშვილისა და მიხეილ შარაშიძის სარჩელი საქართველოს პარლამენტის წინააღმდეგ. დავის საგანს წარმოადგენდა საარჩევნო კოდექსის ის ნორმები, რომელიც განსაზღვრავდა, რომ საპარლამენტო არჩევნებისთვის თითოეული მუნიციპალიტეტი, გარდა თბილისისა, წარმოადგენდა ერთმანდატიან მაჟორიტარულ საარჩევნო ოლქს. გადაწყვეტილების თანახმად, მაჟორიტარის არჩევისას გათვალისწინებული უნდა იყოს ამომრჩეველთა და მაჟორიტარების პროპორციული რაოდენობა.
