საქართველოში აშშ-ის ელჩის რიჩარდ ნორლანდის შეფასებით,
უმნიშვნელოვანესია, რომ არასამთავრობო ორგანიზაციები საკუთარ შეფასებებს მთავრობის მუშაობასთან დაკავშირებით, თავისუფლად აკეთებენ.
როგორც მან სასტუმრო „თბილისი მარიოტში“ მმართველი გუნდის მუშაობის ორი წლის შეფასებასთან დაკავშირებით, არასამთავრობო ორგანიზაციების მიერ გამართულ კონფერენციაზე განაცხადა, მთავრობის მუშაობას დიპლომატიური კორპუსიც აკვირდება.
„დღეს ყველაზე მნიშვნელოვანი მიმდინარე პროცესია, რომლის მოწმენიც ვართ, როდესაც დინამიური და სიცოცხლისთ სავსე არასამთავრობო სექტორი თავისუფლად გამოთქვამს აზრს, საუბრობს იმ პრობლემებზე და გამოწვევებზე, რომლებიც მთავრობას ჰქონდა. ვიცი, რომ ეს ანგარიში 2014 წლის დეკემბრამდე პერიოდს შეეხება და 2015 წლის განვლილ პერიოდს არ მოიცავს,“ - განაცხადა რიჩარდ ნორლანდმა.
მისივე თქმით, არასამთვრობო სექტორის მიერ გამოთქმულ შენიშვნებს მთავრობა სერიოზულად იღებს, იქნება ეს პოზიტიური, თუ ნეგატიური შენიშვნები.
„მთავრობამ ასევე დაიწყო რეაგირება ზოგიერთ მოსაზრებაზე. დიპლომატიური კორპუსი აკვირდება ამ პროცესებს და არასამთავრობო ორგანიზაციების მხრიდან ამ მიმართულებით გადადგმულ ნაბიჯებს მივესალმებით,“ - განაცხადა რიჩარდ ნორლანდმა.
სასტუმრო „თბილისი მერიოტში“ „ქართული ოცნების“ მმართველობის ორ წლის შეფასებასთან დაკავშირებით, არასამთავრობო ორგანიზაციები კონფერენციას მართავენ.
