საქართველოს პრემიერ-მინისტრი ირაკლი ღარიბაშვილი საქართველოს მოქალაქეებს დამოუკიდებლობი დღეს ულოცავს.
,,მინდა მოგილოცოთ ჩვენი ქვეყნისთვის ერთერთი ყველაზე მნიშვნელოვანი დღე. უპირველეს ყოვლისა მინდა მათ ოჯახებსა და შთამომავლებს მივულოცო, ვინც ეს დღე საკუთარი სისხლის ფასად გაგვითენა და მათ, ვისი მამა, ძმა თუ მეგობარი სულ რამდენიმე წელია საკუთარი თავგანწირვის შედეგს გმირთა სამყაროდან გადმოსცქერის.
მხნეობას და სიმტკიცეს ვუსურვებ ჩვენი ერის უძვირფასეს ნაწილს, რომელსაც დამპყრობლის ჩექმის ატანა უწევს აფხაზეთსა თუ სამაჩაბლოში. მშვიდობით დაბრუნებას ვუსურვებ ოკუპანტის მიერ გატაცებულ და ტყვეობაში მყოფ ჩვენს დებს და ძმებს. მინდა მთელი გულით მოგილოცოთ დღევანდელი დღე დევნილებს და გითხრათ, რომ ზეიმი და სიხარული ვერ იქნება სრულყოფილი ტერიტორიული მთლიანობის აღდგენის და თქვენი შინ დაბრუნების გარეშე, ამიტომაც გეფერებით და გპირდებით, რომ ყველაფერს ვიღონებთ ამ ნატვრის ასახდენად. ვულოცავ თითოეულ ქართველს, ვინც დღეს უცხო მიწაზე თავისი ქვეყნის თავისუფლებას ზეიმობს.
დაე, მარად გვეზეიმოს დამოუკიდებლად შენება, გამთლიანება, ძლიერება განვითარება და კეთილდღეობა.
ღირსეულ ბრძოლას და თავისუფლებას გისურვებ საქართველო’’!- აცხადებს ღარიბაშვილი.
