„ნაციონალური მოძრაობის“ წევრის გიორგი ვაშაძის განცხადებით, პარტიაში მიმდინარე პროცესების შესახებ საზოგადოებისთვის 27 მაისს გახდება ცნობილი. რამდენიმე დეპუტატის მიერ „ნაციონალური მოძრაობის“ დატოვების შესახებ გავრცელებული ინფორმაციის კომენტირებისას ვაშაძემ განაცხადა, რომ პარტიაში გარკვეული დისკუსია მიმდინარეობს და ყველაფერს ოთხშაბათს გაასაჯაროებენ.
,,ყველაფერს გაიგებთ ოთხშაბათს. არის გარკვეული დისკუსია შიგნით, ჩვენ ვმსჯელობთ სხვადასხვა საკითხებზე პარტიაში და გვექნება ჩვენი პოზიცია, რომელსაც დავაფიქსირებთ“, - აღნიშნა ვაშაძემ.
ინფორმაცია იმის შესახებ, რომ საპარლამენტო უმცირესობის წევრებმა - სერგო რატიანმა, ზურაბ ჯაფარიძემ, გიორგი მელაძემ, პავლე კუბლაშვილმა და გიორგი გაბაშვილმა სავარაუდოდ, „ნაციონალური მოძრაობა“ დატოვეს, ტელეკომპანია „იმედმა“ გაავრცელა.
ამასთან, ზურაბ ჯაფარიძის მიერ აღმასრულებელი მდივნის პოსტის დატოვების შესახებ ინფორმაცია ,,ჯი-ეიჩ-ენს” გიგი წერეთელმა დაუდასტურა. თუმცა, იგი ვერ ადასტურებს ,,ჯი-ეიჩ-ენის” ინფორმაციას, ნაციონალების ,,რესპუბლიკურ პარტიაში” გადასვლასთან დაკავშირებით.
