პარლამენტს დღეს სახელმწიფო უსაფრთხოების სამსახურის შესახებ კანონპროექტი წარედგინა, რომლის მიხედვითაც, უსაფრთხოების სტრუქტურები შს სამინისტროდან გადის და ცალკე სამსახურად ყალიბდება. აღნიშნული სამსახური იქნება საქართველოს მთავრობის უშუალო დაქვემდებარებაში, აღმასრულებელი ხელისუფლების სპეციალური დანიშნულების გასამხედროებულ დაწესებულებათა სისტემა. ცვლილებები შედის 60-მდე კანონპოექტში. საკანონმდებლო პაკეტის ინიციატორია მთავრობა, ცვლილებები შს სამინისტროს რეფორმირების უწყებათაშორისმა კომისიამ მოამზადა.
საკითხის ინიცირებას პარლამენტის თავმჯდომარე დავით უსუფაშვილი გამოეხმაურა და განაცხადა, რომ ცვლილებები შსს-სა და უსაფრთხოებისა სამსახურების მიმართულებით მნიშვნელოვანი რეფორმების გატარებას გულისხმობს.
„ეს კანონპროექტი სერიოზული მოცულობისაა და წარმატებულ მუშაობას გისურვებთ“, - განაცხადა უსუფაშვილმა.
