ეკონომიკური განვითარების ცენტრის ხელმძღვანელი რომან გოცირიძე მიიჩნევს, რომ ეროვნული ბანკიდან საბანკო ზედამხედველობის გამოყოფა, შეიცავს ქვეყნის ფინანსური სისტემის სერიოზული დესტაბილიზაციის საფრთხეს. ინიცირებული შესაბამისი საკანონმდებლო ცვლილებების კომენტირებისას გოცირიძე აცხადებს, რომ იგი მთლიანად ანგრევს წლობით ნაშენებ საბანკო რეგულირების სისტემას.
,,წავიკითხე ერoვნული ბანკიდან საბანკო ზედამხედველობის გამოყოფის შესახებ კანონპროექტი. შეიძლება პირდაპირ ითქვას, რომ ეს არის დანაშაულებრივი დოკუმენტი. ეს არ არის შექმნილი იმ ადამიანების მიერ, ვისი სახელითაცაა ინიცირებული. მათ მიაჩეჩეს მზა დოკუმენტი და ათამაშებენ მარიონეტებივით. ეს ცვლილებები სცდება რომელიღაც უწყების გამოყოფის საკითხს. იგი მთლიანად ანგრევს წლობით ნაშენებ საბანკო რეგულირების სისტემას და შეიცავს ქვეყნის ფინანსური სისტემის სერიოზული დესტაბილიზაციის საფრთხეს. რაღაც კომისიების შექმნაზე რომ საუბრობენ, მართლაც უნდა შეიქმნას პარლამენტის საგამოძიებო კომისია ამ კანონპროექტის ნამდვილი ავტორებისა და მათი მიზნების გამოსამზეურებლად”, - განაცხადა გოცირიძემ.
დღეს პარლამენტის ბიუროზე შესაძლოა იმსჯელონ საფინანსო-საბიუჯეტო კომიტეტის თავმჯდომარის ინიციატივაზე. თამაზ მეჭიაური საბანკო ზედამხედველობის სამსახურის საქართველოს ეროვნული ბანკისგან გამოყოფის და მისი ცალკე საჯარო სამართლის იურიდიულ პირად ჩამოყალიბების მომხრეა.
