თბილისის საკრებულომ დღეს მხარი არ დაუჭირა თბილისის მუნიციპალიტეტის 2015 წლის ბიუჯეტში ცვლილებების პროექტს. საკრებულომ ასევე ჩააგდო მერის 5 მრჩეველის დანიშვნის საკითხიც.
საკრებულოს მმართველი გუნდის პროტესტი თბილისის მერის დავით ნარმანის განცხადებამ გამოიწვია, რომლის თანახმადაც, არავის საქმეა, ვის დანიშნავს იგი თავის მრჩევლად.
ჟურნალისტებტან გაკეთებული ამ განცხადების გამო კოალიცია „ქართული ოცნების“ რამდენიმე დეპუტატმა დღეს სხდომათა დარბაზი დატოვა. მერის მიმართ შეკითხვები ჰქონდათ კოალიციაში შემავალ „რესპუბლიკური პარტიის“ დეპუტატებსაც. კერძოდ, ისინი დაინტერესდნენ თუ კონკრეტულად რომელ სფეროში სჭირდება მერს დამატებითი მრჩეველი, თუმცა მერიის წარმომადგენლისგან მათ კონკრეტული პასუხი ვერ მიიღეს.
თბილისის 2015 წლის ბიუჯეტის დასამტკიცებლად საჭირო იყო 26 დეპუტატის ხმა. მხარი დაუჭირა 22-მა, წინააღმდეგი იყო 12. ამ საკითხთან თემატურად მიბმული მეორე საკითხი - მერიის ადმინისტრაციის საშტატო ნუსხის დამტკიცების შესახებ თითქმის ერთხმად ამოიღეს დღის წესრიგიდან.
