რუსეთის ფედერალური საბჭოს საერთაშორისო საკითხების კომიტეტის თავმჯდომარე კონსტანტინ კოსაჩევი აცხადებს, რომ ,,აღმოსავლეთ პარტნიორობის” პროგრამაში მონაწილე ზოგიერთ ქვეყანასთან უვიზო რეჟიმის გაფორმების შესახებ ევროკავშირის მიერ, მყარი გარანტიების მიუცემლობა რუსეთს არანაირად არ უკავშირდება.
მისი თქმით, რიგის სამიტში მონაწილე ზოგიერთი ქვეყნის ,,მოსკოვის მაქინაციებზე” განაწყენება, იმიტომ, რომ ,,არათუ ევროკავშირის წევრობის ნათელი პერსპექტივა, არამედ უვიზო რეჟიმის გაფორმების გარანტიებიც ვერ მიიღეს” ყოველგვარ საფუძველს მოკლებულია.
,,ხომ თვალსაჩინოა, რომ მიზეზი, რის გამოც უკრაინასთან უვიზო რეჟიმის მიღებას ასე აჭიანურებენ, ეს არის კრიზისში ჩაფლული ქვეყნიდან მიგრანტთა დიდი ნაკადის შესვლის საშიშროება და არა ევროკავშირის გადაწყვეტილებაზე რუსეთის შესაძლო ნერვული რეაქცია.” - წერს თავის ბლოგში კოსაჩევი.
ამასთან, ის დარწმუნებულია, რომ ევროკავშირისთვის უფრო მომგებიანი იქნება, თუ უვიზო რეჟიმს არა უკრაინასთან, არამედ რუსეთთან გაფორმებს. ვინაიდან, მისი თქმით, რუსები ევროპაში ფულის დასახარჯად მიდიან და არა ფულის საშოვნელად.
,,თუმცა, წმინდა პოლიტიკური მიზეზების გამო ბრიუსელი დღეს არარეალისტური დაპირებებს სულ სხვა ქვეყნებს აძლევს.” - აცხადებს რუსი პოლიტიკოსი.