თავდაცვის მინისტრის თინა ხიდაშელის განცხადებით, საქართველოს უკვე შესრულებული აქვს ყველა ის მოთხოვნა, რომელიც ევროკაშირის მხრიდან იყო. ამის შესახებ მან რიგაში მიმდინარე მოვლენების კომენტირებისას ჟურნალისტებთან განაცხადა.
მისი თქმით, საქართველომ ექვს თვეში გააკეთა ის , რასაც მოლდოვამ ორი წელი მოანდომა.
„რასაც ორი წლის განმავლობაში აკეთებდა მოლდოვა, სანამ უვიზო მიმოსვლამდე მივიდოდა, ჩვენ ეს მოთხოვნები, ყველა საკანონმდებლო რეგულაცია, ყველა ნორმატიული ქმედება ექვსი თვის განმავლობაში დავასრულეთ,“ - აღნიშნა მინისტრმა.
მისივე თქმით, არ შეცვლილა ოპტიმისტური განწყობა იმასთან დაკავშირებით, რომ 2015 წელი
ევროპასთან უვიზო მიმოსვლის წელი იქნება.
„მოლოდინი არ შეცვლილა ერთი წამითაც კი. არის ძალიან ოპტიმისტური, რომ 2015 წელი საქართველოსთვის იქნება ევროპასთან უვიზო მიმოსვლის წელი. ეს იქნება 21 ან 22 მაისს, რიგაში, თუ პირობითად, 27-28 ოქტომბერს სხვა რომელიმე ქალაქში, არ მგონია, იყოს პრინციპულად მნიშვნელოვანი. პრინციპულად მნიშვნელოვანია, დეკლარაციაში აისახოს კონკრეტული ვადა, რაც არის ჩვენი მხარის მოთხოვნა, რათა მოლოდინი არ იყოს უსასრულო და დაუსრულებელი“, -განაცხადა თინათინ ხიდაშელმა.