რიგაში მყოფმა საქართველოს ექსპრეზიდენტმა მიხეილ სააკაშვილმა უკრაინაში მიმდინარე რეფორმებზე ისაუბრა და მისი გუნდის მუშაობით უკმაყოფილო მოქალაქეებს უპასუხა.
სააკაშვილი აცხადებს, რომ უკრაინაში ბევრი რამ გაკეთდა, თუმცა კიდევ ბევრი რამაა გასაკეთებელი.
„უკრაინაში ეკა ზღულაძე ძალიან წარმატებულია, იმიტომ, რომ პოლიციის რეფორმა ახლა ერთადერთი რეფორმაა, რომელიც საყოველთაო ნდობით სარგებლობს. ეკას დაქვემდებარებაშია მთელი რეფორმატორების ჯგუფი და ყოჩაღ ეკას, ის მართლა ძალიან პოპულარულია უკრაინაში“, - განაცხადა მიხეილ სააკაშვილმა.
მისივე თქმით, უკრაინის პროკურატურაში დავით საყვარელიძემ მნიშვნელოვანი ცვლილებები დაიწყო. ადვოკატი გიზო უგლავა კი, ძალიან მნიშვნელოვან თანამდებობაზე დაინიშნა.
„გიზო უგლავა რეალურად, უკრაინაში კორუფციასთან დაკავშირებული საგამოძიებო საქმეების ერთ-ერთი მთავარი მოქმედი პირია. კიევის მერიაში რაღაცები გავაკეთეთ და ჯანდაცვის სამინისტროშიც რაღაცები დაიწყო. ყველგან ერთნაირად არ იქნება, მაგრამ თუკი რამე კეთდება ისევ, ქართველები ამის მნიშვნელოვანი ნაწილია“, - აღნიშნა სააკაშვილმა.
შეგახსენებთ, უკრაინაში მარალ თანამდებობებზე დანიშნული ქართველების მიმართ, ადგილობრივ მედიაში კრიტიკული მასალები მოხშირდა. უკრაინის უმაღლეს რადაში ჯანდაცვის მინისტრის ალექსანდრე კვიტაშვილის გადადგომის მოთხოვნაც კი დარეგისტრირდა.
