საქართველოს ყოფილი პრეზიდენტის მიხეილ სააკაშვილის განცხადებით, ვიზალიბერალიზაციაზე უარს აქვს თავისი პოლიტიკური მიზეზები. როგორც მან რიგაში განაცხადა, საქართველომ ვერ შეასრულა საჭირო კრიტერიუმები.
,,ძალიან კონკრეტულად ითქვა, რომ ამას აქვს თავისი პოლიტიკური მიზეზები და საქართველომ ვერ შეასრულა ის კრიტერიუმები, რომელიც ამას სჭირდება. მთავარი საქმე იმაშია, რომ საქართველოს მთავრობას სულ ფეხებზე ჰკიდია, ივლიან თუ არა საქართველოს მოქალაქეები უცხოეთში. თვითონ ხომ დადიან დიპლომატიური პასპორტებით. ჩემს დროს უკვე მივაღწიეთ, რომ პირველ ეტაპად თუ დიპლომატიური პასპორტი გაქვს სამსახურებრივი, გიშვებენ ევროპაში. ამიტომ თვითონ, თავისი ნათესავები, ოჯახის წევრები ისედაც დადიან ევროპაში, ისვენებენ ევროპულ კურორტებზე”, - აღნიშნა სააკაშვილმა.
საქართველოში ძებნილი ექსპრეზიდენტი ასოცირების ხელშეკრულების საკითხსაც შეეხო და განაცხადა, რომ მისმა ხელისუფლებამ ქვეყანა ასოცირებამდე მიაგორა და დღევანდელი ხელისუფლება კი შემდგომ ნაბიჯებს არ დგამს..
,,საქართველო ასოცირებამდე მივაგორეთ, როგორც ურემი, აი ასე, ხელი ვკარით და მიგორდა, მაგრამ როდესაც ინერციაა - ის გაჩერდა. მიგორდა ასოცირებამდე, მაგრამ ახლა გაჩერდა, იმის იქეთ ვეღარ მიგორავს იმიტომ, რომ კიდევ უნდა მიაწვეს ვიღაცა, მაგრამ მთავრობა იმის მაგივრად, რომ იქით მიაწვეს, ჩამჯდარია შიგნით და ერთ ადგილს ატკეპნინებს ქვეყანასაც და ამ ჩვენს ევროინტეგრაციასაც. ახლა დღესავით ნათელია, რომ თავიდანვე ვიძახდით, რომ კარგი, ასოცირებამდე ინერციით მივალთ, კარგი, რაღაც ფული დავტოვეთ და ინერციით რაღაც გაკეთდება და მერე აღარ კეთდება იმიტომ, რომ ახალი ფული უნდა დაამატო, ახალი რეპუტაცია უნდა დაამატო..”, - აღნიშნა სააკაშვილმა.
,,ნაციონალური მოძრაობის” წევრები რიგაში ,,ევროპის სახალხო პარტიის” წევრებს შეხვდნენ.
