ვიზალიბერალიზაციასთან დაკავშირებით საქართველოსა და უკრაინის მცდელობები საკმარისი არ არის და ყველა პირობის დაკმაყოფილებამდე ჯერ კიდევ ბევრია გასაკეთებელი. ამის შესახებ, ბუნდესტაგში სიტყვით გამოსვლისას გერმანიის კანცლერმა ანგელა მერკელმა განაცხადა.
მერკელის შეფასებით, ორივე ქვეყენამ უნდა გააძლიეროს კორუფციასთან ბრძოლა, ეკონომიკური სტრუქტურები და სასამართლო სისტემა. მისივე თქმით, აღმოსავლეთ პარტნიორობა არ არის ევროკავშირის გაფართოების პოლიტიკის ინსტრუმენტი.
„უკრაინაში მიმდინარე მოვლენები არის მიზეზი, რის გამოც ჩვენ ივნისში არა დიდი რვიანის, არამედ დიდი შვიდეულის ფორმატში შევიკრიბებით. რუსეთი, ისევე როგორც გასულ წელს ბრიუსელში, არ იქნება წარმოდგენილი. დიდ შვიდეულს ჩვენ ფასეულობების ერთობად განვიხილავთ. ეს ნიშნავს ერთობლივად მუშაობას მშვიდობისთვის, დემოკრატიისთვის და კანონის უზენაესობისთვის. ეს ნიშნავს სახელმწფოების ტერიტორიული მთლიანობის პატივისცემას. ვიდრე რუსეთი ამ ღირებულებებს არ იზიარებს, მისი დაბრუნება დიდ რვიანში წარმოუდგენელია,“ - დასძინა ანგელა მერკელმა.
